Ezker Anitzak hurbiltasun printzipioa babestu du, ekoizpen eredu gisa

Ezker Anitza-Iratzarrik Europako ekoizpen ereduak "lur oreka eta hurbiltasun printzipioa" oinarri izan beharko lituzkeela uste du.

Koalizio ezkertiarrak ekitaldia egin du Ordizian, Europako hauteskundeetako kanpainaren baitan, eta, bertan, Leire Martinez eta Iñigo Martinez hautagaiak izan dira.

"Ordiziako merkatuan gaude, tokian tokiko ekonomiak duen garrantzia aldarrikatzeko",  azaldu du Leire Martinezek. Ekitaldi honekin, gainera, "gure nekazariei eta ekoizleei" babesa agertu nahi izan diete.

Leire Martinezen esanetan, Ezker Anitza-Iratzarri koalizioa "beharrezkoa" da Europan, "guk ordezkatzen dugun ezkerra ez baitabil postureoan, ez dabil Kutxabank pribatizatzen eta ez dago EiTBn enplegu erregulazio espedienteak onartzeko prest; diferenteak gara".

Hautagai ezkertiarrak "Europan sinistu" egiten dutela azaldu du, "baina ez egoera honetan". "Europa eraldatu egin behar dugu", gaineratu du.