Udal eta Foru Hauteskundeak -

M24

EH Bilduk dio ustelkeriaren eta murrizketen alternatiba bakarra dela

Kike Fernandez de Pinedo Arabako ahaldungai nagusiak eta Miren Larrion Gasteizko alkategaiak azpimarratu dute koalizioak eramango duela "aldaketa" Arabara.

PP eta ustelkeria alde batera uzteko unea dela dio EH Bilduk

1:08

agentziak | erredakzioa

Whatsapp Facebook Twitter Telegram Email

Pello Urizar EH Bilduren bozeramaile eta EAren idazkari nagusiak esan du koalizioa dela "ustelkeria ezaren, murrizketa sozial ezaren eta klientelismo ezaren berme bakarra".

Urizarrek maiatzaren 24ko udal eta foru hauteskundeetarako kanpainaren irekiera ekitaldian parte hartu du, Gasteizko Matxete plazan, Kike Fernandez de Pinedo Arabako ahaldungai nagusiarekin eta Miren Larrion Gasteizko alkategaiarekin batera.

Bozeramaile abertzaleak ohartarazi duenez, "sistema politiko oso bat dago, gizartearen zati bat atzean geratzea eta bazterkeria egoeran egotea axola ez diona", eta salatu du eredu horrekin "ustelkeria hazi" egiten dela "arazorik gabe".

Hala, beste alderdi batzuen ustezko ustelkeria edo irregulartasun kasuak aipatu ditu: Hiriko, Epsilon, De Miguel, San Antonio, etab."Ustelkeria orokorra" dela azpimarratu du, eta horren aurrean EH Bildu aurkeztu du "murrizketen, ustelkeriaren eta diru publikoa xahutzearen" alternatiba gisa, gainerakoek "eredu horri eutsi nahi baitiote kosta ahala kosta".

Horregatik, bozetan herritarrek "sistema iraultzea" dutela "jokoan" adierazi du. "Bi aukera daude: EH Bildu ala gainerako guztiak", berretsi du Urizarrek. Gainera, "porrot egin duen eredu ekonomiko eta sozial" horri "eusteko" helburuarekin, "elkar babesten eta ezkutatzen" aritzea leporatu die PPri, EAJri eta PSE-EEri.

Zentzu horretan hitz egin du Kike Fernandez de Pinedo Arabako ahaldungai nagusiak ere, eta hitzeman du maiatzaren 24an "EH Bilduren eskutik" iritsiko dela "aldaketa" Arabara.

"Gainerakoek eserlekuari eutsi eta haien artean kromoak trukatu besterik ez dute egin nahi, baina hori ez da aldaketa, alternantzia baizik, eredu horretan sakontzeko", adierazi du hautagaiak, Trebiñu Araba dela aldarrikatu aurretik.

Miren Larrion Gasteizko alkategaiak bat egin du aurreko bien iritziarekin, eta "Araban garai berria irekitzear" dagoela eta EH Bilduk Udalean eta Aldundian "PP kanporatu" egingo duela esan du.

"Amaitu da ustelkeriaren eta diskurtso arrazistaren garaia, eredu gardenaren unea iritsi da", gaineratu du Larrionek, Segiko kideak izateagatik Auzitegi Nazionalak zigortu dituen gazteen askatasuna eskatu ondoren.

Hau zure interesekoa bada, baliteke beste gai hauek ere izatea
Gasteizko Udala albisteak Araba Udal eta Foru hauteskundeak 2015 Ustelkeria politikoa gaur Ustelkeria politikoa EH Bildu Gasteiz albisteak