Udal eta foru hauteskundeak -
M26 hauteskundeak
Akatsak aztertzea eskatu dio Marlaskak M26ko botoak zenbatu zituen enpresari
Asteazkenean hasi eta larunbatean bukatuko dute maiatzaren 26ko hauteskundeetako emaitza ofizialak jakinarazteko prozesua.
AGENTZIAK | ERREDAKZIOA
Fernando Grande-Marlaska Espainiako Barne ministroa Scytl-Vector enpresarekin bildu da bart. Maiatzaren 26ko hauteskundeetako behin behineko emaitzak jasotzeaz arduratu zen enpresa horrekin izandako bileran, webgune ofizialean jasotako akatsak aztertzea eta "erantzun azkar bat" ematea exijitu die Scytl-Vectorreko arduradunei, Ministerioko bozeramaile batek jakinarazi duenez.
Azken orduotan Gobernuak eta Ministerioak berak eman dute emaitzekin izandako akatsen berri.
Dirudienez, botoak zenbatu zituen enpresak erabilitako argitalpen-irizpideengatik gertatu ziren akatsak. Izan ere, lurralde bakoitzeko laburpena azaltzen den lekuan "boto erabilgarriak" soilik islatu zituzten, eserleku kopurua bazter utzita. Udalerri bakoitzeko informazioa kontsultatzean, ordea, ikusgai zegoen aipatu informazioa.
Moncloako iturriek astelehenean ziurtatu zutenez, hauteskundeetako lehiaketa irabazi zuen aldi baterako enpresa-elkarteak prest dauka dagoneko webgunearen bertsio berria, eta asteazkenerako erabilgarri egotea aurreikusi zuten hasiera batean.
Hain zuzen ere, asteazkenean hasi eta larunbatean bukatuko dute maiatzaren 26ko hauteskundeetako emaitza ofizialak jakinarazteko prozesua.