Bildu: 'Abian da tren soziala, soberanista eta ezkertiarra'

Martin Garitano (EAJ) Gipuzkoako Batzar Nagusietarako hautagaiak esan du EAJk ez duela "erdiko ubidea" ordezkatzen: "Erdiko ubidea Euskal Herriak osatzen du eta bere botoekin EAJk, Zapaterok lagunduta, euskal herritarren xede sozialak eta nazionalak geldiarazteko eraikitako dikea gainditzea posible izango da".

Bilduk Donostiako Trinitate plazan egindako ekitaldi politikoan egin ditu adierazpenok Martin Garitanok. Jesus Mari Larrazabal, Ander Rodriguez eta Juan Carlos Izagirre hautagaiak ere bertan izan dira.

Martin Garitanok nabarmendu duenez, "aldaketa abian da, tren sozial, abertzalea, soberanista eta ezkertiarra abian da; tren honek askapen nazionalera eta sozialera eramango gaitu, horretarako konpromisoa hartu du Bilduk, eta bide horretan lehen geltokia maiatzaren 22koa izango da".

Garitanok gogor kritikatu du Markel Olanok herri honetako "erdiko ubidea" EAJ dela esan izana. "Erdiko ubidea ez da EAJ; erdiko ubidea Euskal Herria bera da eta Bilduri emango dizkion botoei esker, EAJk, Zapaterok lagunduta, euskal herritarren xede sozialak eta nazionalak geldiarazteko eraiki zuen dikeak gainezka egingo du", azpimarratu du.

Bilduk inkestek diotena baino boto gehiago izango dituela iragarri du eta, ondorioz, koalizioak "aldaketa politiko eta soziala, normalizazio politikoa eta behin betiko bakea" ekarriko dituela esan du.

"Bildu efektuaz hitz egiten hasi dira, baina efektu hori ez da birtuala, ez marketin kanpaina on baten ondorioa, efektu horrek benetako aldaketak nahi dituen herria biziri dagoela erakusten du eta gauzak aldatzeko aukera historikoa eskaini digu", azaldu du.

Bestalde, Juan Carlos Izagirre Donostiako alkategaiak ohartarazi du komunikabideetan publikatzen diren inkestak "tranpaz beteta" daudela eta ziur agertu da Bilduk "emaitza askoz hobeak" izango dituela.

"Gu ilusioz beteta gaude eta gainerakoek beldurra dute, aldaketari izua diotelako", erantsi du.