Maiatzaren 28ko foru hauteskundeetarako zerrendaburuak ezagutzera eman ditu Eusko Alderdi Jeltzaleak Miramoneko Parke Teknologikoan.
Gipuzkoak "elkarlanean, berme guztiekin eta norabide argi batekin aurrera egiteko", maiatzaren 28ko foru hauteskundeetarako Eider Mendozaren hautagaitza aurkeztu du gaur goizean EAJk, Miramoneko Parke Teknologikoan egindako ekitaldi batean.
"Desesperantzaren, egoismoaren, promesa handien eta populismoaren aurrean, gipuzkoarrei eskaintzen diegu ilusioa, komunitatearen indarra, demokrazia, proposamen zintzoak eta lana, lana eta lana", laburbildu du Eider Mendoza egungo foru diputatuak eta Gipuzkoako ahaldun nagusi izateko hautagaiak.
Bestalde, Joseba Egibar Gipuzko Buru Batzarreko presidentearen esanetan, Gipuzkoa eta Euskadi gaur egun dauden lekura ekarri dituena EAJ da.
Maiatzeko hauteskundeetarako 100 egun falta direla, Egibarrek azpimarratu du EAJk Gipuzkoako gizartearekin "bat egiten jakin" izan duela eta "herri proiektu sendoa" abiatu duela.