Arrauna
Kontxako Bandera
Arraun Lagunak, Orio, Tolosaldea, Hibaika, Cabo, Hondarribia eta Chapela sailkatu dira Kontxarako
I. G. | EITB MEDIA
Zazpi taldeek denborarik onenak lortu dituzte Donostiarrarekin batera hurrengo bi igandeetan Kontxako Bandera jokatzeko.
Albisteak (2)
Arraun Lagunak, Orio, Tolosaldea, Hibaika, Cabo, Hondarribia eta Chapela sailkatu dira Kontxako Bandera jokatzeko, ostegun honetan, irailak 1, Donostiako uretan jokatu den sailkatze estropada gainditu ondoren. Antolatzailea izateagatik sailkatuta zegoen Donostiarrarekin batera, bandera etxera eramateko borrokatuko dute hurrengo bi igandeetan (irailaren 4an eta 11n).
Guztira 19 traineruk parte hartu dute sailkatze estropadan eta zazpik bakarrik lortu dute Kontxa jokatzeko txartela. Arraun Lagunakek aurrerapausoa eman du sailkapenaren buruan 10 minutu eta 46 segundoko denborarekin. Oriok, Euskotren Ligako irabazleak, 4 segundo gehiago behar izan ditu, eta Tolosaldeak 11 segundo gehiago.
Hibaikak (11:09) sailkapeneko laugarren postua eskuratu du, Caborengandik oso gertu (11:10). Hondarribiak (11:11) eta Chapelak (11:17), seigarren eta zazpigarren postuak lortu dituzte, hurrenez hurren, eta Kontxako Bandera jokatzeko txartela lortu duten traineruen multzoa itxi dute.
Gainerako taldeak denbora horien gainetik geratu dira, beraz, ezin izango dituzte estropada horiek jokatu Donostiako uretan.
Kontxako Banderako lehen jardunaldiko txandak:
Sailkapen estropada amaitu ondoren Kontxako Banderaren lehen jardunaldiko txandak zozketatu dira. Lehen txandan Hibaika, Tolosaldea, Cabo eta Hondarribia arituko dira. Bestalde, bigarren txandan Arraun Lagunak, Orio, Donostiarra eta Chapela aterako dira.
Kontxako Banderako sailkatze estropadako lehen 10 taldeen sailkapena. Argazkia: EITB Media
Kontxako Banderako sailkatze estropadako azken 9 taldeen sailkapena. Argazkia: EITB Media
