Athletic Club
Errege Kopa
Athleticek aurrera egin du Kopan Alziraren aurka gehiegi sufritu gabe (0-2)
I. G. | EITB MEDIA
Alex Berenguer eta Nico Williamsen golek garaipena eta Errege Kopako hurrengo faserako txartela eman diote Bilboko taldeari.
Athletic aise eta sufritu gabe sailkatu zen Errege Kopako bigarren kanporaketarako, Alzira 0-2 mendean hartuta Luis Suñer Pico zelaian, Alex Berenguer eta Nico Williamsen golekin.
Ernesto Valverdek hasierako hamaikako ezagunaren aldeko apustua egin du, ohiko titular ugarirekin, partida hitzordu historikotzat hartu duen Alziraren edozein ezusteko eraso saihesteko. Eszenaratze horrekin, Villalibre lehen gola egiteko zorian egon da 5. minutuan, Lluis Andreu atezaina aurrelariarekin topo egitera behartuz. Athleticek golaren bila jarraitu du, eta 16. minutuan aurkitu du Berenguerren bitartez, Villalibreren asistentzia ona aprobetxatuz.
Euskal taldeak bigarrena egiteko aukera izan du, baina Nico Williamsek ez du aprobetxatu etxeko atezainaren akatsa. Hala ere, internazional zuri-gorriak ez du barkatu atsedenaldia baino pixka bat lehenago 0-2koa egiteko.
Bigarren zatian, Alzirak ez ditu besoak jaitsi nahiz eta bilbotarrek abantaila izan, eta Agirrezabalak behin baino gehiagotan jardun behar izan du kanporaketan gol batekin sar ez zitezen. Bigarren zatian minutu gehiegitan suarekin jokatu arren, Athleticek bere sailkapena ziurtatu du azken txanpan estutasunik gabe jokatuz.
Fitxa teknikoa
0 – Alzira: Lluis Andreu, Abraham Peleteiro, Fer Cortijo, Kaiser, Javier Soler, Solbes (Lado, 80. min), Alvaro Gomez, Jordi Marenya (David Marza, 89. min), Pitu (Sergio Gonzalez, 80. min), Javi Serra (Javi Zarzo, 59. min) eta Beceiro (Ramon, 59. min).
2 – Athletic: Agirrezabala, De Marcos (Lekue, 70. min), Vivian, Iñigo Martinez, Yuri, Ander Herrera (Vencedor, 70. min), Vesga, Nico Williams (Iñaki Williams, 65. min), Raul Garcia, Alex Berenguer eta Villalibre (Guruzeta, 78. min).
Golak: 0-1, 16. min: Berenguer. 0-2, 43. min: Nico Williams.
Epailea: Cuadra Fernandez. Txartel horia atera dio Athleticeko Yuri Berchiche jokalariari.
