Aurten 1.555 enpresa itxi direla salatu du Confebaskek

2013ko urtarriletik abuztura bitartean 1.555 enpresa itxi dituzte Euskal Autonomia Erkidegoan (EAE), eta 2008an krisia hasi zenetik 7.812 guztira, Confebask patronalak ohartarazi duenez.

Udan ere behera egin du Gizarte Segurantzan izena emandako enpresa kopuruak: uztailean 608 enpresa desagertu ziren, eta, abuztuan, 307. 2013ko abuztuko datuak iazkoak baino hobeak dira, orduan 562 enpresa desagertu ziren-eta.

Bosgarren hilabetez jarraian enpresen desegite erritmoa moteldu egin da, baina 2012ko abuztutik 2013ko abuztura bitartean 1.411 enpresa desegin dira.

Lurraldez lurralde, Bizkaian itxi dituzte enpresa gehien (878), Gipuzkoaren (333) eta Arabaren (241) aurretik.

Bestalde, hartzekodunen konkurtsoan sartu diren enpresen zenbatekoak ere gora egin du, 319 izan dira ekainera bitartean, iaz baino % 16,4 gehiago.