Espainiako ekonomia 5 edo 6 hamarren jaitsiko da lehen hiruhilekoan

Luis de Guindos Ekonomia ministroak iragarri duenez, Espainiako Barne Produktu Gordinak 5 edo 6 hamarreneko beherakada izango du urteko lehen hiruhilekoan.

Adierazle guztiak eskuragarria izan ez arren, atzeraldia txikiagoa izango da 2012ko azken hiruhilekoarekin alderatuta. Orduan BPGaren jaitsiera % 0,8koa izan zen.

De Guindosek esan duenez beherakada hori Espainiako Gobernuak egindako aurreikuspenarekin bat dator. Ildo horretan, bigarren hiruhilekoa "apur bat hobea" izango dela iragarri du; hirugarrena, "zerotik hurbil izango da"; eta urteko azken hiruhilekoan "hazkundea izan daiteke".

Enpleguaren alorrean ere eboluzioa antzekoa izango dela adierazi du.

Bestalde, De Guindosek esan du Gobernuak argi daukala bere ibilbide-orria. Horrenbestez, apirilaren 26ko ministroen bileran erreforma berriak eta aurrekontuen orekarako programa onartuko dituztela jakinarazi du.