AEBko blokeo fiskalak mundu osoan ondorioak izan ditzake

Estatu Batuetako egoerak baldintzatu du Nazioarteko Diru Funtsak eta Munduko Bankuak Washingtonen egin berri duten urteroko bilera.

Christine Lagarde Diru Funtseko zuzendariak ohartarazi du munduko ordenan aztoramendu handia gerta litekeela, Estatu Batuetan zorpetzeari buruzko akordiorik lortu ezean. Munduko ekonomian handia zarenean, besteentzako babesleku zarenean, ezin zara kontabilitate kreatiboan ibili, esan du Lagardek.

Izan ere, errepublikanoek eta Gobernuak ostegunera arteko epea daukate, zorpetze maila igotzeko akordioa lortzeko. Osterantzean, Etxe Zuriak dio ezingo dietela ordainketei aurre egin egun horretatik aurrera.

Horri erantsi behar zaio, herrialdeak urri hasieratik bizi duen itxialdia. Milaka langile etxean daude, eta oinarrizkoak ez diren eraikin publikoak itxita. Egunotan hasi dira gune turistiko batzuk irekitzen, Arroila Handia esaterako. Gobernu federalak ordaindu ez eta estatu bakoitzak bere patrikatik egitea adostu dute.