Ekonomia -
Lan gatazka
Akordioa lortu dute Madrileko garbiketaren hitzarmenaren inguruan
Greba eragin zuen aldi baterako lan erregulazio planaz hitz egiteko goizean bilduko dira. Bertan behera geratuz gero, langileak lanera itzuliko dira arratsaldean.
Erredakzioa
Patronalak eta sindikatuek akordioa lortu dute bart, Madrilgo garbiketa sektorearen lan hitzarmenaren inguruan. Datozen bost urteetan soldatak izoztea adostu dute. Itun horri esker, baliteke greba bertan behera geratzea gaur arratsaldean.
Goizaldean iragarri dute akordioa, 02:30ak inguruan. Sindikatuen arabera, negoziazioa "konplexua" izan da, baina lortutakoarekin "pozik" daudela adierazi dute.
Akordioa lortu eta gutxira, 04:00ean, Tragsa enpresa publikoko ibilgailuak Legazpi plazako aparkalekuetatik atera dira, Madrilgo kaleetako gutxiengo garbiketa zerbitzuak betetzeko.
EREaren inguruko bilera
Francisco Jardon, Aselip Garbiketa Publikoko Enpresen Elkarteko presidentea, "neurri batean pozik" agertu da akordioari esker lortutakoarekin, eta "oraindik ezer ez" dakiela adierazi du Madrilgo greba eragin duen lan erregulazio planaren inguruan.
11:30etan hitz egingo dute lan erregulazio planari buruz Madrilgo Lan Ikuskaritzan. Bertan behera geldituz gero, langileak arratsaldean bilduko dira lan hitzarmen berria onartu eta grebari amaiera emateko.
1.100 kaleratze baino gehiago
Ostiralean lan erregulazio planaren inguruan egin zuten bileran, enpresa emakidadunek kaleratzeak 296ra murriztea eskaini zieten sindikatuei, iragarritako lan erregulazio espedientean sartutakoak barne -1.100 baino gehiago-, baina sindikatuek kaleratzeei uko egin zieten.
