Ekonomia -
Bikoiztasunak
Enpresa publikoen kopurua murrizteko ekimena adostu dute EAJk eta PSEk
EAJk eta PSEk adostutako ekimenaren xede nagusia erakundeen “eraginkortasuna” hobetzea eta bikoiztasunekin amaitzea izango dela azaldu du Idoia Mendia sozalistak.
Erredakzioa
Foru Aldundietako enpresa publikoen kopurua murriztera zuzendutako ekimena aurkeztuko dute bihar EAJk eta PSE-EEk Eusko Legebiltzarrean eta Bizkaiko, Gipuzkoako eta Arabako Foru Aldundietan. Ekimenaren helburu nagusia administrazio publikoan dauden bikoiztasunak saihestea izango da.
Idoia Mendia PSE-EEko bozeramaileak iragarri du bihar elkarrekin aurkeztuko duten ekimena. Iazko irailean jeltzaleek eta sozialistek adostutako hitzarmenetako bat da bihar aurkeztuko dutena eta, horren ondorioz, Lurralde Historikoen Legea eta, beharrezkoa baldin bada, Gernikako Estatutua eguneratu beharko dituztela adierazi du Idoia Mendiak.
Adibide gisa, ekintzaileei zuzendutako 250 enpresa publiko egotea “zentzugabekeria” dela esan du Mendiak, horrek herritarrak “nahastu egiten dituelako”.
EAJk eta PSEk adostutako ekimenaren xede nagusia erakundeen “eraginkortasuna” hobetzea eta bikoiztasunekin amaitzea izango dela gaineratu du ordezkari sozialistak.
