Patronalaren proposamena 'guztiz onartezina' dela uste du LABek

Metaleko Lantegien Bizkaiko Federakuntzak (FVEM) egindako proposamena "guztiz onartezina" dela adierazi du LAB sindikatuak; izan ere, "4.000 lanpostu deuseztatuko ditu" eta sektoreko langileei 250 orduko malgutasuna bakarrik emango die.

Sindikatuak FVEMeko egoitzaren aurrean elkarretaratzea egin du. Natale Landa LABeko ordezkariak Eusko Jaurlaritzari eta Iñigo Urkullu lehendakariari eskaera egin die. Landaren ahotan, Urkullu "EAEn 5.000 lanpostu sortu behar dituztela harro esaten ari da". "Horren aurka doan proposamena" ez babesteko eskatu dio Landak Jaurlaritzari.

Sindikatuaren arabera, "lanposturik deuseztatzen ez duen hitzarmen bat" behar da, "metalaren sektore guztiaren gutxieneko baldintza duinak bermatzen eta blindatzen dituen hitzarmen bat".

EAEko Auzitegi Nagusiak Bizkaiko Metalaren Hitzarmena indargabetu zuen. Auzitegiaren sententzia "auzi formaletan eta aspektu juridiko-teknikoetan" galdu egiten da, kritikatu du Landak. "Ez da gaiaren mamira sartzen", gaineratu du.