Urkullu: 'Lehen postuetan kokatuko gara energia berriztagarrietan'

Iñigo Urkullu lehendakariak ziurtatu duenez, "2020. urterako" Eusko Jaurlaritzak Euskadi "energia berriztagarrien lehenengo hamarren artean kokatuko du, gehienbat energia eolikoetan (offshore eremuan, hau da, itsasokoan) eta eguzki energian".

Urkulluk Fusio-Teknologiari buruzko XXVIII. Sinposioaren, SOFT2014, inaugurazio ekitaldian parte hartu du Donostian. Asteazkenean izango da ekitaldia hiriburu gipuzkoarrean; fusio nuklearren teknologiaren inguruko munduko topagunerik garrantzitsuena da, eta bertan 800dik gora zientzialarik, teknologok eta nazioarteko industriak hartuko dute parte.

Besteak beste, Maria Luisa Poncela (Ekonomia eta Lehiakortasun Ministerioko Zientzia, Teknologia eta Berrikuntza idazkari nagusia), Arantza Tapia (Eusko Jaurlaritzako Ekonomiaren Garapen eta Lehiakortasun sailburua) eta Joaquin Sanchez (Ciemtako Fusio Laborategi Nazionaleko zuzendaria) izan dira ekitaldian.

Lehendakariak azaldu duenez, euskal estrategia "hiru ardatzetan oinarrituko da" hurrengo urteetan: "energian, ekoizpen aurreratuan eta biozientzia-osasuna binomioan".

"Argi daukagu Euskadi erreferente bihurtu nahi dugula Europa mailan, aipatutako hiru esparru horietan. Herrialde mailako erronkak dira, egin daitezkeenak eta itxaropentsuak", esan du.

"Iberdrola, Gamesa, Arteche, Sener, Tubacex, Velatia taldea eta Ormazabal enpresak, esaterako, erronka honen eragileak dira", Urkulluren arabera.

Gainera, esparru horretan "indarrak batzeko" beharra azpimarratu du, "teknologiako eta enpresa alorreko proiektuak batu eta norabide berean arraun egiteko, herrialde mailako erronka hau gauzatzeko".