UGTk eta CCOOk Nafarroako Gobernuaren akordioa babestea kritikatu dute

ELAk ez du ulertu UGT eta CCOO sindikatuek CENek eta Nafarroako Gobernuak suspertze ekonomikoa sustatzeko adostutako akordioa babestu izana. Guztira 41 neurri adostu dituzte, 545,5 milioi euroko aurrekontuarekn 2015-2017 urteen bitartean. "CCOOk eta UGTk eskaini duten argazkia, zoritxarrez, duela hainbat urte gertatzen denarekin koherentea da: murrizketa politikei babesa ematea eta diru publikoarekin bizirik irautea, isilik egotearen truke. Adibidez, CANen auzian ikusi duzu", adierazi du sindikatuak agiri batean.

ELAren ustez, "arinkeria" bat da esatea gizarteak akordio honekin onura jasotzen duela, "UGTk, CCOOk eta CENek milioika euroko kudeaketa banatzen duten bitartean".

Horrela, ELAk uste du ez dela "zorrotza" "suspertzeari babesa" ematen dela esatea, "Gobernuak defizitarekin itsututa dagoen bitartean". Zorra ordaintzea dute lehentasuna, sindikatuaren ustez, eta "politika fiskal bidegabearekin" jarraitzen dute.

Onartutako neurrien oso antzekoek ez dute emaitzik eman, ELAk adierazi duenez, eta Elkarrizketarako Mahaia "1995tik dago lanean eta ez du langabeziaren hazkundea eta lan-baldintzak zein sozialak galtzea, eta Nafarroa Estatuko zerrendaburu izatea soldata galerari dagokionean".

Sindikatuaren ustez, akordioa sinatu dutenek "aitortu nahi ez duten helburua" zera da: "politika horiek babesteaz gain, euren finantziazioa diru publikoz betetzea". "Diru publikoaren dependentzia sindikalismoaren heriotza da", azaldu dutenez. Horrela, "diru publikoa xahutzeari uztea eta enpleguaren eta justizia sozialaren aldeko politikak babestea" eskatu du.