Tapiak Arrantza Ministerioari egotzi dio prezioen jaitsiera

Eusko Jaurlaritzako Ekonomiaren Garapen eta Lehiakortasun sailburuak Espainiako Arrantza Ministerioari egotzi dio prezioen jaitsiera eta euskal arrantza sektoreak izandako lehiakortasun galera. Izan ere, Arrantza Ministerioak ez die baimena eman euskal arrantzaleei aurreko hilabeteetan berdela harrapatzeko. "Gauzak ezin dira aurten bezala egin", azpimarratu du, eta Madrilek beste erkidegoetako ontzi batzuen interesak lehenetsi dituela salatu du.

Tapiak Hondarribiko portura joan da gaur goizean, Bittor Oroz Nekazaritza eta Arrantza sailburuordearekin eta Leandro Azkue Arrantza zuzendariarekin batera, berdelaren kosteraren nondik norakoak bertatik bertara ikusteko.

Hondarribiko kofradiako kideekin elkartu da, eta portuko instalazioak bisitatu ditu. Han zegoela, arrantzaleek arraina nola deskargatzen zuten ere ikusi du. Tapiaren esanetan, arrantza sektorearen kezka nagusiak hauek dira: berdelaren prezioaren jaitsiera eta lehendabiziko antxoa aleak portura heltzen ari direla.

Berdelaren prezioa jaitsi egin bada ere, berdelaren kostera "ondo doa eta Hondarribian diharduten arrantza-ontziek berdel kuotaren % 80 harrapatu dute dagoeneko", adierazi du.