Argitaratuta kutxetako komisioak mugatzen dituen lege-dekretua

Espainiako Gobernuak gaur argitaratu du kutxa automatikoetako komisioak mugatzeko lege-dekretua Espainiako Aldizkari Ofizialean, atzo Espainiako Ministro Kontseiluak lege-dekretua onartu ondoren.

Kutxa automatikoaren jabe den finantza erakundeak ezingo dio zuzenean komisioa kobratu bezeroari, bai ordea kreditu-txartela jaulkitzen duen erakundeari, eta horrek aldi berean tasa bat ezarri ahal izango dio erabiltzaileari. Halaber, finantza erakundeek gehienezko komisioaren zenbatekoaren berri eman beharko dute kutxazainaren pantailan.

Dekretu-legea, bihar, urriak 4, sartuko da indarrean, baina finantza erakundeek 2016ko urtarrilaren 1era bitarteko epea izango dute beren ordainketa-sistemak legearen beharretara moldatzeko.

Ekonomia Ministerioaren iturrien arabera, behin dekretu-legea argitaratuta, bezero ez den entitateak gainordaina kobratzeko aukera desagertzen da.

Aipaturiko iturriek adierazi dutenez, urtarrilaren 1era bitarteko epea izango dute bankuek legearekin loturiko auzi operatiboei heltzeko, tartean, kreditu-txartelaren jaulkitzaileak kutxazainaren jabeari ordaintzen dio komisioa ezartzeko. Aipaturiko gainordain hori bien artean adostu beharko dute, gainerakoan, kutxazainaren jabeak inposatuko du.

Dirua ateratzeagatik ezartzen duten komisioaren berri eman beharko diete bankuek Espainiako Bankuari. Bestalde, CNMC Espainiako Merkatuen eta Lehiaren Batzorde Nazionalak txosten bat igorri beharko dio urtero Espainiako Ekonomia eta Lehiakortasun Ministerioari finantza erakundeek komisioen inguruan hartzen dituzten erabakien gainean, eta lehen txostena datorren urteko lehen seihilekoan jaulkiko da.