Turismoen salmenta % 47 hazi zen otsailean

Aurtengo otsailean 91.281 turismo saldu zituzten, hau da, iazko hilabete berean baino % 47 gehiago, Anfac auto fabrikatzaileen elkarteak eta Ganvam saltzaileen elkarteak jakitera eman dutenez.

Inoiz izan den gorakada handiena da portzentajeari dagokionez, izan ere, 2009ko otsaileko datua oso baxua da, turismoen merkatua % 48,8 murriztu zelako.

2000E Planaren eragina oso nabaria da, zeren km-ko 149 CO2 gramo baino gutxiago (Espainiako Gobernuaren planak laguntza ematen dien autoak) isurtzen dituzten autoen salmenta % 107,5 altuagoa izan da aurten.

Automobilgintzako elkarteek ohartarazi dute aurtengo bi hilabeteetan 2000E Planaren 100 milioi euroko aurrekontuaren erdia xahutu dutela, beraz, laguntzak maiatzera ez direla iritsiko aurreikusi dute.