Zuzendaritzak Sestaoko ACB lantegia irekitzeko plana proposatu du

Sestaoko ACB lantegia berriro irekitzea ahalbidetuko lukeen plana aurkeztu dio Arcelor Mittalen zuzendaritzak langile-batzordeari. Fabrika baldintza zehatz batzuetan jarriko lukete martxan, uztailetik aurrera.

Zuzendaritzak zabaldutako oharraren arabera, 10.000-12.000 tona produzitzea izango litzateke asmoa, asteburuetan lan eginda eta bolumen gutxiko ekoizpenerako industria-egitura berria ezarrita.

Maiatzean, planaren xehetasunak zehaztuko dituzte, eta ekainean, Sestaoko lantegiko zuzendaritzari eta langileen batzordeari aurkeztuko diete. Bi aldeen oniritzia lortuz gero, Arcelor Mittalen zuzendaritza nagusiak eman beharko du behin betiko onespena.

Salmenta prezio baxuak eta txatarra gordetzeko eta argindarra eskuratzeko kostu altuak azpimarratu dituzte berriro enpresako arduradunek. ACB ekonomikoki bideragarria izateko, “kostu egituraren optimizazio beharrezkoa da, eta alde guztien konpromisoa beharrezkoa izango da aurrera eramateko”, gogorarazi dutenez.

"Ez da guk geneukan ideia", adierazi du Juan Carlos Diaz Sestaoko enpresa-batzordeko presidenteak Radio Euskadiko 'Boulevard' irratsaioan.

Ekoizpena elkartzeko proposamena ulertzen dutela esan du, "baina beste era batera, ez bakarrik asteburuetan". "Geneukan ideiatik oso urrun dago", azpimarratu du.

Ziurgabetasuna

ACBko enpresa batzordeak zuhurtziaz hartu du albistea, eta zuzendaritzak plana aurkeztu arte ez dutela baloraziorik egingo esan dute. Dena dela, orain arte jaso dituzten informazioek "ziurgabetsauna" eragiten dietela esan dute langileek, eurek proposatutako planetik "oso urruti" dagoelako enpresak proposatutakoa. Maiatzaren 12an dute bilera zuzendaritzarekin, eta hor ezagutuko dituzte proposamenaren xehetasunak.

Langileen arabera, enpresa batzordeak ez du inoiz proposatu Sestaoko lantegia asteburutan bakarrik zabaltzea. Enpresak jakinarazi zien aukera aztertzen ari zela, orain aste batzuk.

Tapiak zuhurtzia eskatu du

Bestalde, Arantza Tapia Ekonomiaren Garapen eta Lehiakortasun sailburuak azpimarratu duenez, datozen asteak erabakigarriak izango dira ArcelorMittalek Sestaon eta Zumarragan dituen lantegientzat. "Zuhurtziaz eta itxaropen faltsurik sortu gabe" lan egiteko deia egin die alde guztiei.

Eusko Legebiltzarreko kontrol saioan egin ditu adierazpenok Tapiak, Jon Azkue legebiltzarkide sozialistak egindako galderari erantzunez. ArcelorMittalen itxierak eragindako kalteei aurre egiteko, Eusko Jaurlaritzak zer plan duen azaltzeko eskatu dio Azkuek Tapiari.

Datozen egunotan ArcelorMittaleko zuzendaritzarekin biltzekoa dela Jaurlaritza gogora ekarri du sailburuak. Bilera horretan, Sestaoko eta Zumarragako plantetarako inbertsio-planak jarriko dituzte mahai gainean.

Zumarraga

Sestaoko lantegia aldi baterako geldialdi mugagabean dago iragan otsailetik. Bien bitartean, lantegia ixteko, lanpostu aldaketak egiteko plana igorri die talde siderurgikoaren zuzendaritzak Zumarragako (Gipuzkoa) beharginei dagoeneko.

Lanpostu aldaketen eta neurri konpentsagarrien inguruan erabaki bat hartzeko, batzarra egingo dute gaur Zumarragako langileek. Atzo, enpresa-batzordea Avilesen bildu zen, Asturiaseko lankideekin, enpresaren aurrean plataforma bakarra sortzeko. Behargin guztiak, euskal herritarrak eta asturiarrak, Zumarragako fabrika zabalik mantentzearen alde azaldu dira.