Estatuko industria-ekoizpenak igoera motelagoa izan du ekainean: % 1

Industria-produkzioaren indizea (IPI) % 1 areagotu da ekainean, 2015eko hile berarekin alderatuta; alabaina, tasa hori maiatzean izandakoa baino 2,9 puntu txikiagoa da (+% 3,9). Hala jakinarazi du ostiral honetan Estatistikako Institutu Nazionalak (INE).

Ekaineko hazkundea kontua hartuta, industria-ekoizpenak urtetik urterako hirugarren igoera darama errenkadan.

Aipatu hazkundea izateko arrazoia sektore guztietan izandako areagotzea da, energiarenean izan ezik (% 3,4 jaitsi zen urtetik urterako tasan). Igoera handiena kontsumo-ondasun ez iraunkorrek eskuratu zuten (+% 4,4), haien atzetik kontsumo-ondasun iraunkorrak (+% 1,6), ekipamendu-ondasunak (+% 1,3) eta bitarteko ondasunak (+% 0,7) geratu dira.

Behin urtaroko eta egutegiko eraginak zuzenduta, Estatuko industria-ekoizpenak % 0,8ko igoera aurkeztu zuen 2015eko hil beraren aldean, maiatzean izandakoa baino 0,1 puntu txikiagoa (+% 0,9).

% 2ko jaitsiera EAEn

EAEko datuei dagokienez, euskal industria-jarduera % 2 jaitsi zen ekainean, aurreko urteko hilabete berarekin alderatuta, INEren datuen arabera.

Datu horiek ez datoz bat aste honetan bertan Eustatek argitaratutakoekin; izan ere, EAEko industria-jarduera ekainean % 0,2 hazi dela adierazten dute datu horiek, baita urteko lehen sei hilabetean % 2,1eko hazkundea pilatu dela ere.

% 1,4ko igoera Nafarroan

Nafarroako Industria-produkzioaren indizeak urtez urteko % 1,4ko hazkundea izan du ekainean, Nafarroako Estatistika Institutuak jakitera eman duenez. Kasu horretan, datuok bat datoz INEkoekin.