Gaurko greba bosgarrena izango da sektore publikoan 1988tik

CCOO, UGT eta CSIF sindikatuek gaurko deitutako funtzionario greba bosgarrena izango da 1988tik Espainiako sektore publikoan.

Hain zuzen ere, soldaten murrizketaren aurka egingo dute protesta.

Espainian soldata murriztuko dieten hiru milioi funtzionarioetatik, 526.000 Administrazio zentralekoak dira, 1.674.000 Administrazio autonomikoetakoak eta 663.000 udal administrazioetakoak, Espainiako Estatistika Institutuaren (INE) datuen arabera.

Administrazioan manifestazio eta sektorekako lanuzte ugari izan badira ere, sektore publiko osoan egindako lehen greba 1988ko azaroaren 24an egin zuten. Bi orduko lanuzteak izan ziren, Gobernuaren politika sozialaren aurka protesta egiteko.

Urte bereko abenduaren 14an, sindikatuek greba orokorra egin zuten. Gobernu sozialista baten aurka egindako lehena izan zen.

Hurrengo lanuzteak 1992ko azaroaren 26an eta abenduaren 15ean egin zituzten, UGTk, CCOOk eta CSIFk deituta, 1993rako aurreikusita zegoen soldata murrizketaren aurka.

1996ko abenduaren 11n, PPren Gobernuaren aurkako lehen mobilizazio handia gauzatu zuten (urte horretan bertan iritsi zen agintera). Lanuztea soldatak izozteko planaren aurkakoa izan zen, eta Madrilen manifestazio handia eginez amaitu zuten. "Gauza batzuk denonak dira. Defendatu publikoa dena", zen aldarria.

Funtzionarioen % 81,3k egin zuten bat protestarekin, sindikatuen arabera, baina Mariano Rajoy garai hartako Administrazio Publikoetako ministroak % 18,67ra jaitsi zuen portzentajea.

Abenduaren 11ko greba baino lehen, baina, lau eguneko protestak egin zituzten Espainia osoan. Lehena irailaren 30ean izan zen, eta horretan 38.000 pertsonak baino gehiagok elkarretaratzeak egin zituzten probintzietako hiriburuen Gobernu Zibilen aurrean.

Urriaren 15ean manifestazioa egin zuten, eta azaroaren 7an lanuzte partzialak Administrazio autonomikoetan eta Osasun zerbitzuan.

Azaroaren 23an funtzionarioek manifestazioa egin zuten Madrilen, eta 200.000 pertsonak hartu zuten parte. Amaieran, Loquillok kontzertua eskaini zuen.

Mobilizazioak sektore publikoan ordezkaritza zuten sindikatu guztiek deitu zituzten (CCOO, UGT, CGT, USO, CIGA, CSI-CSIF, SUP eta UFP).