Ekonomia -
Industria
Aurreikusitakoak baino 350 kontratu gehiago, Gasteizko Mercedesen
Aurreko akordioan mila kontratu mugagabe (500 hitzarmenaren sinaduran, eta beste 125 urtero, 2020 urtera arte) sortzeko konpromisoa hartu zuten, baina orain 1.350 izango dira 2017ko abendura arte.
Agentziak | Erredakzioa
Hasieran aurreikusitakoak baino 350 kontratu mugagabe gehiago egingo ditu Mercedes Benz konpainiak Gasteizko lantegian, CCOO sindikatuak jakitera eman duen akordioaren arabera.
Sindikatuak agiri batean azaldu duenez, “orain zein etorkizunerako akordio handia” itxi dute astearte honetan, Mercedes Benz Espainiako Hitzarmen Kolektiboaren Zaintzarako Batzordean.
Kontratu mugagabeen kopurua areagotu dela jakitera eman du CCOOk. Aurreko akordioan mila kontratu mugagabe (500 hitzarmenaren sinaduran, eta beste 125 urtero, 2020 urtera arte) sortzeko konpromisoa hartu zuten, baina orain 1.350 izango dira “2017ko abendura arte”.
Gainera, ekoizpen programen eta salmenten arabera, lantegiko kontratu mugagabeen portzentajea % 80koa izan behar dela jaso du akordioak, sindikatuak erantsi duenez.
Bestalde, Mercedes Benzen erabakia ELAri esker etorri dela azaldu du sindikatu abertzaleak. Finkoak izatera pasako diren aldi baterako langileen hautaketa irizpide “objektiboekin” egitea eskatu du ELAk, “iraganeko hanka-sartzeak” saihesteko.