Ekonomia -
Zerga-erreforma
PPrekin akordio fiskala lortuko dutela ziur agertu da Ramiro Gonzalez
Hala, hasierako proposamenean aldaketaren bat egongo dela uste duen arren, zerga arloko 'aldaketak' onartzea ahalbidetuko duela adierazi du.
Agentziak | Erredakzioa
Ramiro Gonzalez Arabako diputatu nagusia ziur dago EAJk eta PSE-EEk akordio fiskala lortuko dutela PPrekin. Hasierako proposamenari "aldaketaren bat" eginda, hiru lurraldeetan zerga-erreforma eta aurrekontuak, "Araban, behintzat", onartzea espero du.
Atzo Alfonso Alonsok (PP) azaldutakoaren arabera, "zerga-erreforma PPrekin hitzartuta egiten ez bada, ez da aurrekontuetarako adostasunik egongo". Adierazpen horri buruz galdetu diotenean erantzun du hori Gonzalezek.
Arabako diputatu nagusiak garbi utzi du EAJ PPrekin hitz egiten ari dela gai horiek negoziatzeko. Izan ere, zerga-erreforma onartzeko "bazkideren bat" izatea beharrezkoa zela bazekitela nabarmendu du.
"Akordioetara iritsi eta negoziatzeko borondatea izanik, akordioak lortzea posible da. Konpontzeko ezinezkoa den gairik ez dago", aipatu du proposatutako zerga-erreformari buruz hitz egiterakoan. Zerga-erreforma beharrezkotzat jo du PPk 2018ko EAEko aurrekontuak negoziatzen hasteko.
Gonzalez optimista agertu da, "zerga-sistemari buruzko aldaketak onartzeko hiru Batzar Nagusietan akordioa egongo dela" uste duelako. Gainera, aurrekontuen inguruko adostasuna lortuko dutela ere ziurtatu du, "Araban behintzat".
