ErNE eta Jaurlaritzaren aurreakordioa, bigarren jarduerari eta mugikortasunari buruz

ErNE Ertzaintzako sindikatuak eta Eusko Jaurlaritzako Segurtasun Sailak aurreakordioa lortu dute bigarren jarduerari heltzeko adinari eta mugikortasunari dagokionez, Roberto Seijo ErNEko idazkari nagusiak jakinarazi duenez.

Segurtasun Sailak eta Ertzaintzan ordezkaritza duten lau sindikatuetako ordezkariek (ErNE, Esan, ELA eta Euspel) bilera egin dute gaur goizean Erandioko egitzan, Brigada Mugikorraren modernizazioa negoziatzeko.

Brigada Mugikorrari buruzko proposamenak egiteaz gain, ErNE sindikatuak bigarren jarduerari eta mugikortasun geografikoari buruzko hainbat planteamendu aurkeztu ditu eta bi gai horietan aurreakordioa lortu du Segurtasun Sailarekin.

Bigarren jarduerari (adinagatik patruilatzeari uzten dioten ertzainak) heltzeko adinari dagokionez, 56 urtetik 55era jaistea adostu dute. Gainera, urtean hiru lanegun gutxiago egin beharko dituzte eta gauean lan egiteagatik ordaina jasoko dute. Seijoren esanetan, iaz ere gai horri buruzko aurreakordioa lortu zuten; orain, ordea, akordioa gauzatzeko prest agertu omen da Segurtasun Saila. Neurri horrek 8.000 ertzaini eragingo die.

Mugikortasun geografikoari lotuta, ostera, aurrerantzean ezohiko egoeretan soilik aplikatuko da. Gaur egun, herritarren segurtasunerako eta ikerketako ertzainei eragiten die batez ere, hots, 4.000-5.000 ertzaini.