Metro Bilbaok salaketa jarriko du, greba legez kanpokoa dela iritzita

Metro Bilbaoko zuzendaritzak adierazi duenez, epaitegian salaketa jarriko du datozen 21 eta 22 egunetarako deitutako greba legez kanpokoa dela uste duelako. Horrez gain, enpresa-batzordeari beste bilera bat egitea eskatu dio metroak Gabon gauean funtziona dezan. Akordiorik lortzen ez badute, "bizkaitarrek pairatu beharko dituzten kalteen ardura izango du beste aldeak", zuzendaritzaren aburuz.

Ernesto Gasco Metro Bilbaoko presidenteak enpresa-batzordearen jarrera "arduragabea eta itxia" kritikatu du; izan ere, Gabon gauean metroa irekitzea negoziatzeko baztertu dute orain arte.

Zerbitzu publikoa eskainiko dela bermatzeko, Gascok enpresa-batzordeari datorren astelehen arratsaldean beste bilera bat egitea eskatu diotela adierazi du.

"Gabon gauean Metroak funtzionatu behar du eta, hasierako eskaintzan oinarrituta, beste irtenbide batzuk bilatzeko prest gaude, denon oniritzia jasoko duen beste zerbitzu batzuekin eta langile gehiagorekin. Akordiorik lortzen ez badugu, beste aldearen erantzukizuna izango da", azaldu du.

Presidentearentzat "sinestezina" da langileen ordezkaritzak irtenbide bat aurkeztu ez izana eta, hortaz, "gizarte bizkaitarrari xantaia egiten ari dira".