Ekonomia -
Urtarrilaren 27an izango da
ESK-k bat egin du sindikatu abertzaleek deitutako greba orokorrarekin
Greba ELA, LAB, EILAS, EHNE eta HIRU sindikatuek deitu dute, Gobernuak urtarrilaren 28an onartuko duen pentsioen erreformaren aurka protesta egiteko.
Erredakzioa
ESK sindikatuak bat egin du gaur ELAk, LABek, EILASek, EHNEk eta HIRUk pentsioen erreformaren aurka urtarrilaren 27rako deitutako greba orokorrarekin.
Zentralak agiri batean azaldu duenez, "mobilizazioak" egitea baino beste biderik ez dago pentsioen erreforma "basatia" geldiarazteko, eta hortaz, "sindikatuek ezin diote bizkarra eman" protestari.
Greba egiteko urtarrilaren 27a hautatu izana "albiste ona" dela esan du, baina "gainerako sindikatuekin" adostu izan balute hobe izango zitekeela gaineratu du.
ESKren ustez, greba orokorra erreformaren izapide parlamentarioetan iraungo duen borrokaren lehen urratsa izango da, erreforma hori lege bihurtzea saihesteko. "Legea atzera botatzea galdutzat eman behar ez dugun borroka da", nabarmendu du.
Halaber, "elkarrizketa sozial faltsuak" gizarteak ez mobilizatzea, gogogabezia eta langileen eskubide murrizketak baino ez dituela ekarriko salatu du.
Horrenbestez, sindikatuak dei egin die gainerako sindikatuei grebarekin bat egin eta "langileen eskubide murrizketa etengabeari irmo aurre egin" diezaioten.
