Bilboko NH eta Barcelo hoteletako grebalarien ordezkapen 'lotsagabea' salatu du ELAk

Bilboko NH eta Barcelo hoteletan greba egiten ari diren gela-zerbitzariak "lotsagabeki" ordezkatzen ari direla salatu du ELAk. "Miseriazko soldatak, onartu ezinezko lan-kargak eta kontratazioan iruzurra" salatzen ari dira greba mugagabe baten bidez.

Constant Taldekoko langileak dira gela-zerbitzariak. Hotel horietako garbiketaz arduratzen dira, azpikontratatuta.

Sindikatuak "hotel horien jarrera lotsagabea" salatu du. "Gatazka honi konponbide bat eman beharrean, grebalariak lotsagabeki ordezkatu dituzte", eta horrek "kolektibo horren oinarrizko eskubidea kentzea" dakar.

Bestalde, ELAren arabera, Constant Taldeak ez du erakutsi "alde sozialarekin negoziatzeko eta kolektibo honen lan-baldintzak duintzeko asmorik". "Miseriazko soldatak, onartu ezinezko lan-kargak eta kontratazioan iruzurra" sufritzen dituzte langile horiek.

Sindikatuak esan duenez, greba mugagabeak langileen "prekarietatea konpondu" arte jarraituko du. Igandean, berriz Bizkaiko hiriburuko hotelen aurrean elkarretaratzeak egingo dituzte.