Euskadik egindako diafraktometroa eman diote Oxfordeko ISIS lantegiari

Patxi Lopez lehendakaria euskal enpresek egin duten diafraktometro bat Oxfordeko ISIS lantegiari emateko ekitaldian izan da; Ingalaterrako neutroien espalazioaren arloko zentrorik garrantzitsuenetako bat da, Jaurlaritzak ohar batean jakinarazi duenez.

Lehendakariaren hitzetan, ISIS lantegia ESS-Leioa zentroaren garapenerako "oinarrizko aliantza" bat da. "Euskal Herriari dagokionez, komunitate txiki bat gara, baina gure gaitasun zientifiko eta teknologikoa areagotu nahi ditugu, munduko orotariko ezagutza-sareetan parte hartuz, eta, bereziki, Europakoetan", esan du Patxi Lopezek.

Harwell-ko campusa Britainia Handiko ikerketa zentro garrantzitsuenetako bat da. 1.200 zientzialari eta ingeniari baino gehiago daude han lanean, eta potentzia altuko laserrak, ISIS neutro-iturria eta Diamond sinkrotroia dauzka, Jaurlaritzak azaldu duenez.

HiPR diafraktometroa azken belaunaldiko tresna bat da eta oso presio altuetan -250.000 atmosferaraino- laginekin lan egiteko prestatua dago.

Patxi López lehendakariak azpimarratu du lankidetza hori "eredugarria" dela ESS-Leioa zentroarentzat. Zentro horretan partikulen azelerazioarekin lotutako teknologietan lan egingo da eta eskualde mailako neutroi-iturri bat barne hartzeko ahalmena izango du".

Euskal enpresa, zentro teknologiko eta ikerketa-taldeak Laborategi horretako ISIS iturriarekin lankidetzan daude dagoeneko, Zentro berria garatzeko behar ditugun oinarrizko aliantzak dira, eta, gainera, Lund-en eraikiko den Europako Neutroien Espalazioaren Iturri berriari lagunduko dio", gehitu du.