Hezkuntza: 'Onartezina da eskola-jantokietan gatazkak jarraitzea'

Eusko Jaurlaritzako Hezkuntza Sailaren iritziz, "onartezina" da irakaskuntza publikoko eskola-jantokietan gatazkak jarraitzea, eta ez dago horretarako "arrazoirik". Halaber, grebaren zenbait unetan ematen ari den "neurrigabeko zitalkeria" gaitzetsi du.

Bi lurraldetara (Bizkaia eta Gipuzkoa) mugatutako jarraipena izan duen greba bat dela esan du Hezkuntza Sailak. Ez da Arabako inongo ikastetxetan gatazkarik gertatu eta beste bi lurraldeetan jarraipena plantilaren % 23 ingurukoa izan da.

Datu horiek, ordea, ez datoz bat "guztiz neurririk gabekoa" den eta, eskola-jantokiaren zerbitzua ez ezik, ikastetxeen funtzionamendu normala ere "aztoratu nahi duen gogortasun" batekin. Gainera, greba honek "kalte larria egin nahi die familia erabiltzaileei eta hezkuntza-zerbitzu publikoari".

"Arduragabekeria" hori are larriagoa da, euskal eskola publikoari egindako erasoa baita, "herrialde honetako haur guztiei irakaskuntza-baldintza on batzuk segurtatzeaz arduratzen den zerbitzu publikoari, alegia".

Kolektibo horren lan-baldintzek ez dute hezkuntza-zerbitzu publikoari egin zaion eraso honen larritasuna justifikatzen. "Lanaldia ezin da itxikeria horretarako aitzakiarik izan", esan dute.

Arazoak ere ez du soldata duinekin zerikusirik. Haien sektorekoekin konparatuz, soldatak % 23 eta % 36 artean altuagoak dira, eta oraindik altuagoak lirateke, patronalaren proposamena onartuz gero.

"Bideratutako negoziazio bat ez dator greba-egoera horrekin bat. Ezerk ez du irakaskuntza publikoari eta euskal familiei nahita egindako eraso hau justifikatzen", esan du.