Ekonomia -
Alarma egoera
Nekazarien azokak martxan dira, segurtasun neurri zorrotzekin
EAEko Aldizkari Ofizialak azoketan hartu behar diren neurriak zerrendatu ditu, eta nagusiak pertsonen eta postuen arteko distantziak dira.
agentziak | erredakzioa
Nekazarien eta abeltzainen asteroko azokak martxan hasi dira aste honetan berriro, baina koronabirusari aurre egiteko segurtasun neurri zorrotzekin: distantzia, eskularruak, gel desinfektatzailearen erabilera, etab.
Atzo Segurtasun Sailak berritu egin zituen osasun alarmarako irizpideak, eta elikagaien, nekazarien eta abeltzainen zuzeneko salmentarako osasun arauak ezarri zituen. Hala ere, eutsi egin diote debekuari entretenimendura bideratutako azoken kasuan.
Gaur EAEko Aldizkari Ofizialean argitaratu dituzte azokak arautzeko osasun irizpideak. Hori horrela, postuen artean pasabide bat egon behar da, eta gutxienez 6 metro batetik bestera.
Postu beraren barruan, saltzaileek bi metroko distantzia gorde beharko dute, eta ezinezkoa bada, pertsona bakarra egongo da. Saltzaileek erabilera bakarreko eskularruak emango dizkiete bezeroei, eta behar beharrezkoak izango dira produktuak ukitzeko. Era berean, gel desinfektatzailea egon beharko da erosleek eta saltzaileek erabiltzeko.
Kontsumitzaileen arteko gutxieneko distantzia bi metrokoa izan beharko da gutxienez, eta azoka egiten den lekutik gertu bizi beharko dira.
Udaltzaingoak, Babes Zibileko boluntarioek eta agintariek, orokorrean, betearazi beharko dituzte neurriak azoka irekitzen denetik ixten denera, eta jende pilaketak galarazi beharko dituzte.
Apirilaren 8an, EAEko Aldizkari Ofizialak Osasun sailaren agindu bat argitaratu zuen, eta bertan debekatu egiten ziren herriko azokak alarma egoera amaitu arte. Baina horrek ENBA eta EHNE sindikatuen, ekologisten, EH Bilduren, Podemosen eta beste sindikatu batzuen kexa ekarri zuen. Egun gutxira, Jaurlaritzak atzera egin zuen, eta egunotan azokak egiten ari dira.
