Jaurlaritzak beste 30 milioi euro bideratuko ditu autonomo eta enpresa txikientzat

Iñigo Urkullu lehendakariak 30 milioi euroko beste partida bat iragarri du autonomoei eta enpresa txikiei laguntzeko, eta dagoeneko lanean ari direla 2020ko EAEko aurrekontuak berrikusteko adierazi du.

Gasteizen emandako prentsaurreko batean egin du iragarpen hori Eusko Jaurlaritzako lehendakariak, Lanbidek abian jarritako autonomoentzako eta banakako enpresaburuentzako laguntza-programaren eskaera handia dela eta.

Urkulluk adierazi du "presaz" jokatzen ari direla banakako profesionalen egoerari erantzuna emateko, baita arlo profesionalean ahulak diren kolektiboei ere, eta "lehen urratsa" eman zela deialdi horrekin.

Urkulluk iragarri du 30 milioiko beste partida bat bideratuko dutela autonomoei eta enpresa txikiei laguntzeko, eta datozen egunetan finkatuko dutela laguntza berri horiek eskatzeko prozedura zehaztu du.

Horrez gain, beste erakunde batzuetako programak ere izango direla nabarmendu du, eta ahaldun nagusiekin hitz egin duela euskal erakunde guztiak hartzen ari diren neurri ekonomiko guztien inguruan adierazi du, eta haiekin eta Eudeleko presidentearekin egiteko asmoa duen bilera monografiko batean jorratuko dituztela.

Neurri horiekin batera, 2020ko EAEko aurrekontuak berrikusten eta, hala badagokio, "berregituratzen" ari direla esan du Urkulluk.

Deseskalada

Bestalde, Eusko Jaurlaritza osoa normaltasunera itzultzeko plana lantzen ari dela esan du, gai "multisektoriala" delako eta Jaurlaritzako sail guztiak koordinatuta daudelako, "betiere Osasun Sailaren jarraibideak eta irizpideak jarraituz".

"Egiten dugun proposamen oro gidalerroen eta Osasun Sailaren irizpideen mende egongo da, eta Eusko Jaurlaritza osoa inplikatuta dago plana egiteko lan honetan", adierazi du.