Ekonomia -
Koronabirusa
Pentsioen gastua jaitsi egin da lehenengo aldiz, COVID-19a dela eta
Birusa hilgarriagoa izan da adinekoen artean, eta horregatik baja gehiago egon dira, eta beste batzuk erretiroa atzeratu dute negozioak gelditu egin dituztelako.
agentziak | erredakzioa
Gizarte Segurantzaren kotizazio bidezko pentsioen nomina 9.852,78 milioi eurokoa izan da maiatzaren 1ean, aurreko hilean baino % 0,27 txikiagoa; beraz, beherakada izan da pentsioen ordainketan, erretiroa hartu dutenak gutxiago izan direlako eta koronabirusak ohikoak baino heriotza gehiago eragin dituelako adinekoen artean.
Espainiako Inklusio, Gizarte Segurantza eta Migrazio Ministerioak argitaratutako datuetan ikus daitekeenez, maiatzaren 1ean kotizazio bidezko 9.754.137 pentsio izan dira, hilabete bat lehenago baino 38.508 gutxiago.
Pentsiodunen artean izan diren bajetan zerikusi handia izan omen du COVID-19ak adinekoei eragin diela gogorren, eta alta gutxiago izan dira erretiroa hartzear zeuden askok atzeratu egin behar izan dutelako prozesua enpresak itxita egon direlako.
Gizarte Segurantzak jakinarazi duenez, apirilean 31.232 alta izan dira, aurreko hilean baino % 13,9 gutxiago, eta 2019ko hilabete berean baino % 32,2 gutxiago.
Urteko lehenengo lau hilabeteak kontuan hartuta, 157.896 pentsio berri zenbatu dituzte, 2019ko lehenengo lauhilekoan baino % 22,1 gutxiago; eta bajak 205.638 izan dira, aurreko urtean baino % 17,5 gehiago.
Ministerioak ez du apirileko bajen datua eman, baina orokorra eman duenez, 69.857 izan zirela ondoriozta daiteke, martxoan baino 43.370 gehiago, eta 2015eko urtarriletik izan den datu altuena.
