WatchGuard Technologies enpresak Panda Security euskal enpresa erosi du

AEBko WatchGuard Technologies konpainiak Panda Security zibersegurtasun enpresa erosi du (martxoan eman zuen horren berri). Adimeneko eta sareko segurtasuneko soluzioen, Wi-Fi seguruaren eta faktore anitzeko autentifikazioaren enpresa amerikarrak behin betiko akordioa lortu du zibersegurtasuneko soluzio aurreratuen hornitzaile espainiarra eskuratzeko.

WatchGuard Technologiesek jakinarazi duenez, zibersegurtasun enpresa "WatchGuarden % 100eko subsidiario" bihurtu da, eta, eragiketa horri esker, bere bezeroek eta egungo eta etorkizuneko kideek beren oinarrizko segurtasun zerbitzuak sendotu ahalko dituzte, sarea babesteaz gain EDR (Endpoint Detection and Response) plataforma aurreratua erabiliz.

Erosketa egin ondoren, egoitza nagusia Seattlen duen konpainiak Panda Securityren EDRen soluzio aurreratuaren berehalako balioa lortuko dute Panda Security Early Access Program programaren bidez.

WatchGuard Technologies erakundeko Prakash Panjwanik azaldu duenez, bere bezero eta kideek "merkatu ertaineko behar eta eskakizun bakanetarako sortutako enpresa mailako segurtasunerako sarbidea behar dute".

"WatchGuardek segurtasun-zerbitzu horiek ematen ditu, MSP ardatz duen segurtasun-plataforma baten bidez. Plataforma horrek segurtasun-horniduraren alderdi guztiak sinplifikatzen ditu, eta gure posizioa sendotzen du, merkatu ertainerako segurtasun-irtenbide gisa", zehaztu du.

Era berean, "Panda Security erosi eta WatchGuard Clouden sartu izana mugarri garrantzitsua da konpainiarentzat", gaineratu du. Horren ondorioz, "berehalako zein epe luzeko onurak sortuko ditu bezeroentzat eta kideentzat, besteak beste, segurtasunaren konplexutasunaren erronka komunei, sareko topologien bilakaera azkarrari eta erosketa ereduei heltzeko orduan".

Enpresa konbinatuaren berehalako helburua da "bi konpainietako kideei eta bezeroei berriki zabaldu den segurtasun-irtenbideen zorrora sartzeko aukera ematea". Zorroak integratuta daudenean, kideek eta bezeroek honako onura hauek izango dituzte: "Adimen artifizialeko gaitasun modernoek bultzatutako mehatxuen detekzio eta erantzun aurreratuaren funtzionaltasuna, portaera-profilak egiteko teknikak eta abangoardiako segurtasun-ekitaldien korrelazioa, baita onura operatibo gehigarriak ere, hala nola sareko segurtasunaren eta endpointaren kudeaketa zentralizatua".

WatchGuardeko banatzaileek Panda Adaptive Defense 360rako "berehalako sarbidea" izango dute hemendik aurrera. Bertan, endpointerako babes-plataforma, endpointerako hautemate- eta erantzun-gaitasunak (EDR) eta Advanced Reporting Tool-eko produktuak egongo dira, 2020ko ekainaren 1ean kaleratutako Panda Security Early Access Program izenekoaren bidez. Programa berri horrek WatchGuarden kideen esku jarriko ditu produktu berriak, haien prestakuntza eta barne hedapena egiteko, baita azken erabiltzaileei merkaturatzeko ere.

Bestalde, Juan Santamaria Uriarte Panda Securityko burua pozik agertu da WatchGuardeko administrazio kontseiluarekin bat egitean, "eta eguneroko operazioetan aholkatzen jarraitzean, konpainia integratu bat eraikitzen laguntzeko, saretik endpointera doan merkatuko segurtasun irtenbide onena emango duena".