5.039 familiak betetzen dituzte etxebizitza bat eskuratzeko baldintzak

Eusko Jaurlaritzako Ingurumen, Lurralde Plangintza eta Etxebizitza Sailak 5.039 familiari jakinarazi die, gutun baten bidez, etxebizitza-eskubide subjektiboa aitortzeko baldintzak betetzen dituztela, baita hori eskatzeko izapideak ere.

Iñaki Arriolak zuzentzen duen sailak azaldu duenez, Etxebiden izena eman duten pertsonak dira, eta legeak planteatutako eskakizunak betetzen dituzte, baina oraindik ez dituzte izapidetu.

Zehazki, etxebizitza "duin eta egokia" legez okupatzeko eskubide subjektiboa aitortzen zaie etxebizitzarik ez duten, Etxebiden gutxienez lau urteko antzinatasuna duten eta ezarritako mugen barruan diru-sarrerak dituzten eta alokairuko etxebizitza babestuaren eskatzaile gisa erregistratuta dauden adin nagusiko edo adingabe emantzipatuei.

Era honetara, hiru kide edo gehiagoko bizikidetza-unitateek 15.000 eurotik beherako urteko diru-sarrera haztatuak izan behar dituzte, bi kiderenak 12.000 eurotik beherakoak eta kide batenak 9.000 eurotik beherakoak.

Aste honetan banatzen hasi diren jakinarazpenean, gainera, aitorpena tramitatzeko eman behar dituzten pausoen berri eman da, bai eta aitorpena fisikoki eta telematikoki non aurkeztu behar duten zehaztu dute ere. Gutun guztiekin batera dagokion eskaera aurkeztu behar da. Lurraldeka, 598 komunikazio Arabari dagozkio, 3.109 Bizkaiari eta 1.332 Gipuzkoari.

Ia 5.000 pertsona

Etxebizitza Sailetik zehaztu dutenez, eskubide subjektiboaren aitorpena asetzeak berekin ekar dezake alokairu-erregimeneko etxebizitza bat esleitzea, edo, etxebizitza erabilgarririk ez badago, alokairu pribatua ordaintzeko prestazio ekonomiko bat eskuratzea, eta horretarako soilik erabili daitezkeen 250 euro banatzen dira hilean.

Gogorarazi dutenez, ez da Etxebizitza Sailak horrelako jakinarazpenak egiten dituen lehen aldia; izan ere, 2019ko apirilean haien eskubidea gogorarazteko 2.860 gutun bidali zitzaizkien Etxebiden izena eman zuten beste hainbeste pertsonari, eta aurreko urtean 4.450 pertsonari bidali zitzaien jakinarazpena.

Etxebizitza Legea martxan jarri ondoren, Euskadin dagoeneko 4.712 familiari aitortu zaie eskubide subjektiboa. Horietatik 918 Arabakoak dira, 3.228 Bizkaikoak eta 566 Gipuzkoakoak.