Erresidentzien gatazka orain konpontzeko eskatu diote Gipuzkoako Aldundiari

Gipuzkoako Senideak zaharren egoitzetako erabiltzaileen senideen kolektiboak astearte honetan Aldundiari eskatu dio "behingoz, oporretan joan aurretik, zerbait egin dezala" eta zentro horietako lan-gatazka konponduta utz dezala "ondoren etor daitekeenagatik".

Xabier Pierrugues Gipuzkoako Senideak-eko bozeramaileak dei hori egin dio Foru Erakundeari, bere plataformak asteartero Gipuzkoa Plazan egiten duen elkarretaratzean. Bertan, hainbat kidek pankarta bat zabaldu dute, honako leloarekin: "Gipuzkoako Senideak. Aldundia Konponbidea".

"Duela urtebete baino gehiagotik ari gara eskatzen Aldundiak behingoz egoitzetako lan-gatazkan inplikatuta dauden alde guztiak eser ditzala eta akordio batera irits daitezela, hori baita gure kexa eta erreklamazio nagusia", azaldu du Pierruguesek.

"Negoziazio mahaia hautsita zegoen aspalditik, sindikatuak altxatu ziren patronalak proposamen txar bat egin ondoren, eta guk diogu, Aldundiaren bezero zuzenak garenez, erabaki bat hartu behar duena eta gatazkari irtenbide bat eman behar diona Aldundia bera dela, baina ez diegu jarrera horrekin ikusten", zehaztu du.

Gipuzkoako Senideak-en bozeramailearen esanetan, gainera, egoitzen sektorea "bolada txarra pasatzen ari da 243 eguneko greba baten ostean", eta gero covid-19aren pandemia iritsi zelako. Azken horren inguruan, Aldundiaren kudeaketa ez da "batere zuzena" izan, Pierruguesen ustez.