Sindikatuek eskatutako Jaurlaritzaren bitartekaritza errefusatu du Bilboestibak

Eusko Jaurlaritzaren Lan sailburuordetzak gaur eguerdian Bilboko Portuko zamaketa sektoreko sindikatuei jakinarazi die enpresak uko egin diola bitartekaritza prozedurari.

Hala, Lan eta Enplegu Sailak ohar batean azaldu duenez, lan agintaritzak "ezin du gatazkari irtenbidea emateko bitartekaritza lanik hasi" Bilboko Portuko zamaketan, "aldeetako batek uko egin diolako".

Bilboestiba Bilboko Portuko Zamaketa Elkarteak errefusatu egin du sindikatuek proposatutako bitartekaritza, eta agortutzat eman du negoziazio eta bitartekaritza oro. Hala, derrigorrezko zuzenbideko arbitrajea proposatu du.

Sailburuordetzak sindikatuen eskaera helarazi zion Bilbaoestibari, "sortzen ari den egoerarekin kezkatuta eta horrek Bilboko Portuan, Euskadiko ekoizpen sarean eta inguruko erkidegoetan, langileengan eta Portuaren mende dauden gainerako enpresengan duen eraginagatik".

"Lan agintaritzak badu eskumena gatazka kolektiboetan esku hartzeko aldeetako batek eskatu eta besteak onartzen badu", gaineratzen du Sailburuordetzaren agiriak, premiazko bilera baterako deia egin aurretik.