Publizitatea
Itxi

2021/03/16

12:11

Ekonomia

Bilboko Portua

Zuzeneko tren batek Bilboko Portua eta Arasur lotuko ditu ostegunetik aurrera

N.B. | EITB MEDIA

Trena ostegunero abiatuko da hiru orduko ibilbidearekin eta Arasurren lehiakortasuna hobetuko du.

  • Edukiontziak Bilboko Portuan

    Edukiontziak Bilboko Portuan. Argazkia: EITB MEDIA.

  • Whatsapp
  • Whatsapp
  • Telegram
  • Bidali

Arasurko (Rivabellosa, Araba) plataforma logistikoak asteko tren konexioa izango du Bilboko Portuarekin, ostegunetik, hilaren 18tik, Portu Agintaritzak jakitera eman duenez.

Lehenengo trena Portuko edukiontzien terminaletik Arasur trenbide-terminalera (Aratrain izenekoa) aterako da. Bertan, itsasontzian iristen den merkantzia deskargatuko dute, errepide bidez banatzeko, azken helmugaraino.

Tren hori ostegunero abiatuko da, gutxi gorabehera hiru orduko ibilbidearekin, eta Arasurren lehiakortasuna hobetzen lagunduko du; izan ere, 60 TEU (neurketa-unitatea edukiontzietan) garraiatzea ahalbidetzen du ibilbide bakarrean, 20, 40 eta 45 oineko edukiontziak konbinatuz, eta negozio-aukera berriak irekitzen ditu, bai gune logistiko horretarako, bai Bizkaiko porturako.

Aratrain Bilbaoport Zerbitzu Intermodalak (Sibport) kudeatzen du, Jundiz eta Pancorbo trenbideekin batera. Eskaria handitu ahala, tren-zerbitzuaren maiztasuna handitzea aurreikusten du Sibportek.

Terminalak 63.440 metro koadroko azalera du, eta bi bide ditu trenak hartzeko eta bidaltzeko, eta beste bi zamalanetarako.

Lau bideek 450 metroko luzera dute, zabalera iberiarrarekin eta nazioarteko zabalerara migratzeko aukerarekin. Gainera, zamalanetarako hondartza bat prestatu dute merkantzien truke modala errazteko.

Eusko Jaurlaritzak, Arabako Foru Aldundiak eta Portu Agintaritzak Bilboko Portuko trenbide-base operatibo bat Arasurren instalatzeko sinatutako lankidetza-hitzarmenaren emaitza dira trenbide-bazterbidearen obrak. Obra horiek 5,28 milioi euroko aurrekontua izan zuten.

Halaber, Portuko Agintaritzak bide bat eraiki zuen, 0,91 milioiko aurrekontuarekin, Talgorekin egindako akordio bati esker, ADIFen linea nagusirako trenbidea plataformara sartzeko erabiltzeko.

Ondoren, urbanizazio-lanak egin zituen, 4,8 milioi euroko inbertsioarekin, eta gerentzia-eraikin bat eta salgaiak biltegiratzeko nabe bat eraiki ziren.

Guztira, Arasurren egindako inbertsioa (lurren erosketa, trenbide-konexioak, urbanizazioa, eraikinak eta abar barne) 15,7 milioi eurokoa da oraingoz.

 

  • Bisitatuena

      Kargatzen ikusiena
      Kargatzen ikusiena