Milaka langile kaleratzeko asmoa iragarri du BBVAk

BBVAren zuzendaritzak kaleratze kolektiboa egiteko asmoa iragarri du eta sindikatuak bilera batera deitu ostiral honetan, lan-erregulazio espedientea negoziatzen hasteko intentzioarekin.

BBVAk 23.300 langile inguru ditu. Kaleratzeak zerbitzu zentralean eta arlo komertzialean egingo dituzte. Zuzendaritzak ez du argitu zenbat behargin kaleratu nahi dituen, baina joan den urtarrilean Expansion egunkariak zabaldu duenez, 3.000 bat izan daitezke, lantaldearen % 10 murriztea baita bere asmoa.

Erakundeak gutuna igorri die langileei, murrizketak egingo dituela jakinaraziz. Zuzendaritzak hiru arrazoi nagusi aipatzen ditu bere erabakia justifikatzeko: sektorea transformazio sakon batean murgilduta dagoela, lehiakortasuna oso handia dela eta bezeroek kanal digitalak gero eta gehiago erabiltzen dituztela.

Bankuaren iritzian, "kostua murriztea ezinbestekoa da, lehiakortasuna eta etorkizuneko enplegua bermatu nahi badira".  

Sindikatuekin abiatuko duen prozesuan adostasunetara heltzeko borondatea izango duela agindu du zuzendaritzak, balizko akordioa bi aldeentzat ahalik eta onena izan dadin.