Ekonomia -
Krisi ekonomikoa
Espainiako Gobernuak neurri berriak iragarriko ditu gaur
Sektore publikoa murrizteko neurriak aztertuko dituzte. Ogasun ministroak azaldu duenez, Espainiako Gobernua defizit publikoaren "zauria ixteko" premiazko neurri ekonomiko berriak ari da prestatzen.
Erredakzioa
Espainiako Gobernuak defizit publikoaren "zauria ixteko" premiazko neurri ekonomiko berriak iragarriko ditu ostegun honetan. Cristobal Montoro Ogasun eta Administrazio Publikoen ministroak astelehenean azaldu zuenez, neurriak ostegun honetako Ministroen Kontseilura eramango dituzte. Momentuz Montorok ez ditu hauen nondik norakoak aurreratu.
Hori bai, ministroaren hitzetan, Espainian "erabakiak hartzeko gai den Gobernu bat" dagoela erakutsiko diete neurri hauek "nazioarteko bazkideei eta gainontzeko Europako herrialdeei". Sektore publikoa murrizteko neurriak
Administrazioaren menpe dauden 300 enpresa baino gehiago berregituratu eta horrela gastua murrizteko helburua duen txosten bat aurkeztuko du Montorok ostegun honetako Ministroen Kontseiluan. Bilera horretan ildo nagusienetako bat izango omen da txosten hau.
Erkidegoek Gobernuaren baiezkoa beharko dute aurrekontuak onartzeko
Luis de Guindos ministroak erkidegoetako defizita kontrolatzeko helburua izango duen lege berria iragarri du martxorako, aurretiko kontrola ezartzeko. Guindosek Erkidegoetako aurrekontuak ''zorroztasunez'' kontrolatzeko ''neurriak'' ezarriko dituen lege berria iragarri du 'Financial Times' egunkarian. ''Aurretiko kontrolak ezarriko ditugu. Horrela, erkidegoek Gobernuaren baiezkoa beharko dute aurrekontuak onartzeko''.
