Amaiurrek eta EAJk Rajoyren murrizketen kontra bozkatuko dute

Madrilgo Diputatuen Kongresuak aparteko osoko bilkura egingo du gaur urteari hasiera emateko eta Mariano Rajoyren Gobernuak proposatu dituen lehenengo neurri ekonomiko murriztaileak bozkatuko dituzte.

Horrez gain, diputatuek batzordeen egitura berria aurreikusten duen Kongresuaren Araudiaren erreforma onartuko dute.

Rajoy presidente izendatzeko inbestidura eztabaidaren ondoren, gaurko hitzorduan zazpi taldeetako bozeramaileek Gobernuak abenduaren 30an iragarritako neurriei buruzko iritzia eman ahal izango dute.

Amaiurrek eta EAJk dagoeneko iragarri dute Rajoyren neurrien kontra bozkatuko dutela. Koalizio abertzaleak argudiatu du murrizketak "sektore ahulenen kontrako erasoa" direla "langabezia eta pobrezia gehiago eragingo dutelako". EAJk, bere aldetik, Rajoyren neurriak gaitzetsi ditu eta jeltzaleen "konfiantza botoa ez" dutela merezi adierazi du.

Osoko bilkura goizeko hamarretan hasiko da, Kongresuko Mahaiak eta Bozeramaileen Batzordeak, bakoitzak bere aldetik, bilerak egin ondoren.

Lege dekretua Cristobal Montoro Ogasun ministroak aurkeztuko du eta horren atzetik, handitik txikira, talde parlamentario guztiek izango dute hitz egiteko aukera.