Ekonomia -
Moves III plana
Ibilgailu elektrikoak erosteko 7.000 eurorainoko laguntzak emango ditu Eusko Jaurlaritzak
Horretarako, eskatzaileak bere auto zaharra entregatu beharko du; bestela, diru-laguntza 4.500 eurokoa izango da.
Agentziak | EITB Media
Auto elektrikoen erosketa sustatzeko laguntza programa berri bat iragarri du Energiaren Euskal Erakundeak (EEE). Eusko Jaurlaritzaren energia agentzia da hori, eta, iragarri duenez, ibilgailu elektrikoak erosteko subentzioa 7.000 eurora igoko du; laguntzok irailaren 28tik aurrera eskatu ahal izango dira.
Gaur egun indarrean dagoenaren oinordekoa da Moves III programa, eta, besteak beste, partikularrei zuzendutako laguntzen zenbatekoa handituko du horrek. Hala, 16,4 milioi euroko hasierako zuzkidura izango du, gerora handitu daitekeena; horietatik, 9 milioi euro ibilgailu elektrikoak erosteko bideratuko dira, eta gainontzeko 7,4 milioiak horiek kargatzeko azpiegiturak sustatzeko.
Eskaerak EEEren webgune korporatiboan egin ahal izango dira, eta motor elektrikoko ibilgailuak erosteko laguntzak eskatu ahal izango dira, entxufagarriak zein erregai-pilakoak.
Laguntzok ezberdinak izango dira eskatzailea partikularra edo enpresa bada, eta ez da nahitaezkoa izango ibilgailu zaharra entregatzea. Hala ere, azpimarratu dute hori egiteak laguntza handiagoa dakarrela. Adibidez, EEEk azaldu duenez, partikular edo autonomo batek 4.500 euroko laguntza jaso ahal izango du ibilgailu elektriko bat erosteagatik, baina 7.000 eurora igoko da auto zaharra entregatuz gero.
Enpresek, aldiz, hainbat laguntza jasoko dituzte, euren tamainaren arabera, eta zenbatekoa ere handituko zaie ibilgailuak entregatuta.
Gainera, programa berriaren oinarrietan aurreikusten denez, mugikortasun urritua duten eta ibilgailuan egokitzeko beharra duten pertsonentzat ezarritako zenbatekoak % 10 igoko dira gehienez, baita 5.000 biztanletik beherako udalerri batean erroldatuta egoteagatik eta taxia edo gidaridun ibilgailuen zerbitzuak erabiltzeagatik ere.