Ekonomia -
Koronabirusa
Osasun ziurtagiria ez dute gehiago eskatuko Ipar Euskal Herriko merkataritza-gune handietan
Abuztuaren 17tik aurrera, beharrezkoa zen erakustea 20.000 metro karratutik gorako azaleretan, Pirinio Atlantikoetako prefetak hala aginduta. Orain, ordea, agindu hori ezeztatu egin du Paueko Auzitegiak.
EiTB Media
Osasun ziurtagiria ez dute gehiago eskatuko Ipar Euskal Herriko merkataritza-gune handietan, epaitegiek bertan behera utzi baitute. Abuztuaren 17tik aurrera, beharrezkoa zen erakustea 20.000 metro karratutik gorako azaleretan, Pirinio Atlantikoetako prefetak hala aginduta. Orain, ordea, agindu hori ezeztatu egin du Paueko Auzitegiak, Euskadi Irratiak jakitera eman duenez.
Honenbestez, hiru aste ere ez ditu iraun prefetaren aginduak. Paueko Administrazio Auzitegiak bertan behera utzi du erabakia asteburuan, Carrefour taldeak jarria izango lukeen helegite baten harira.
Beraz, hemendik aurrera erosketak egiteko ez da osasun ziurtagiria gehiago eskatuko, 20.000 metro karratutik gorako merkataritza-guneetan. Ipar Euskal Herrian, bi gune dira: Baionako Ametzondo eta Angeluko BAB2. Bertan, ez da kontrolik jada, Gabriela Caro langileak Euskadi Irratiari baieztatu dionez.
Maskararen erabilerak, aldiz, beharrezkoa izaten jarraituko du oraingoz.
Prefetak, orain, zer egin erabaki beharko du; agindua baliogabetu egin dezake, edo aitzitik, helegitea jarri.
Dena den, Frantziako Gobernuak iragarri du 200dik gorako intzidentzia duten departamentuetan soilik mantenduko dela ziurtagiria, orain Pirinio Atlantikoetan 109koa da.
