Itxi

2021/09/28

16:02

Ekonomia

Expovacaciones

Expovacaciones hartuko du asteburuan BECek, iazko geldialdiaren ostean

O.P. | Eitb Media

Guztira, 163 sinadurek hartuko dute parte Expovacaciones turismo azokan, urriaren 1etik 3ra, Bilbao Exhibition Centren. Azokak "eskaintza zabala eta jarduera berriak" eskainiko ditu, "datozen udazken, negu eta udaberriko oporraldiak prestatzeko".

  • Expovacacionesen aurreko edizio bateko irudia.

    Expovacacionesen aurreko edizio bateko irudia. EITB

  • Whatsapp
  • Whatsapp
  • Telegram
  • Bidali

Urriaren 1etik 3ra bitartean, 163 sinadurek hartuko dute parte Bilbao Exhibition Centren (BEC) egingo den Expovacaciones turismo azokan, pandemiaren ondorioz iazko edizioa bertan behera geratu ostean.

Expovacaciones jaialdiaren azken edizioa 2019ko maiatzaren 10etik 12ra egin zen; 69.000tik gora bisitari eta 228 erakusketari izan zituen edizio horrek. Iazko apirilaren 24tik 26ra programatuta zegoena bertan behera geratu zen pandemiaren ondorioz.

Expovacaciones azokaren edizio honen berritasunetako bat data bera da, ez bait ohi bezala bigarren hiruhilekoan egingo, urrian baizik. BECek jakitera eman duenez "eskaintza zabala eta jarduera berriak" eskainiko ditu, "datozen udazken, negu eta udaberriko oporraldiak prestatzeko".

"Estatuko ia helmuga guztiak" egongo dira ordezkatuta: Aragoi, Asturias, Valentziako Erkidegoa, Euskadi, Murtzia, Andaluzia, Katalunia, Extremadura, Nafarroa, Kanariak, Balearrak, Gaztela eta Leon, Kantabria, Gaztela Mantxa eta Galizia, baita Portugal eta Maroko ere.

Doan sartu ahal izaango da Expovacacionesera, gonbidapenen bidez beti ere. Kirol- eta abentura-turismorako eremu bat izango du, Expovacaciones Esperimentua, surfeko ekitaldi eta kanpamenduei, lasterketei eta bizikleta-probei buruzko hitzaldiekin.

"Dastatu Expovacaciones" gunean, hainbat autonomia erkidegotako produktu esanguratsuez gozatu ahal izango du bisitariak, eta gastronomiarekin lotutako oporrak antolatzeko informazioa aurkitu.

Gainera, hilaren 2an, BEC Extreme Dorrearen hirugarren edizioa egingo da. Bertan, parte-hartzaileek BECeko bulegoen dorreko 19 solairuetako 626 mailak igo behar dituzte ahalik eta denbora laburrenean. Dagoeneko 116 pertsonak eman dute izena, tartean 32 suhiltzailek.

  • Bisitatuena

      Kargatzen ikusiena
      Kargatzen ikusiena
    ;