Ekonomia -
Lan gatazka
Ekintza sindikalak KPIaren soldata-igoera lortu du Teknikerreko langileentzat
Teknikerren ordezkaritza duten sindikatuek (LABeko 9 ordezkari eta ELAko 4 ordezkari) Justiziara jotzea erabaki zuten, eta orain arrazoia eman die. Zuzendaritzak "ez zuen metaleko hitzarmenean adostutako KPIaren igoera aplikatu nahi", hitzarmena aurreraeragin-egoeran zegoelako.
Agentziak | EITB Media
Eibarko Tekniker zentro teknologikoko 280 langileek KPIaren araberako soldata-igoera izango dute. LABek jakitera eman duenez, justiziak sindikatuei arrazoia eman die eta Gipuzkoako metalaren hitzarmena aplikatu beharko du enpresak.
LABek ohar batean azaldu duenez, Teknikerren ordezkaritza duten sindikatuek (LABeko 9 ordezkari eta ELAko 4 ordezkari) justiziara jotzea erabaki zuten, zentroko hitzarmen kolektiboa aurreraeragin-egoeran zegoelako eta zuzendaritzak "ez zuelako metaleko hitzarmenean adostutako KPIren igoera aplikatu nahi".
LABek adierazi du ebazpen judizialak arrazoia eman diela langileen ordezkariei, eta, beraz, KPIaren araberako soldata-igoera izango dutela beharginek.
Sindikatuaren arabera, epaia "benetan garrantzitsua eta positiboa" da, "beste hainbat enpresetan aplika litekeelako eta sektoreko hitzarmenetatik datorren babesa indartzen duelako".
Salatu du Tekniker kide den BRTA (Basque Research Technology and Alliance) Ikerketa eta Garapenerako Partzuergoak, langileengan inbertitu beharrean, "murrizketak" aplikatzen dituela, "Teknikerren kasuan bezala, soldatak KPIaren arabera eguneratzeko asmorik ez zuena".
Gainera, Eusko Jaurlaritzari dei egin dio "gehiegizko publizitatea" alde batera utzi, eta "zientziaren eta teknologiaren aldeko benetako apustua" egin dezan, "BRTA partzuergoko langileen lan-baldintzak hobetuta", esaterako, hori baita sindikatuen ustetan "industriaren lehiakortasunari egin diezaiokeen ekarpenik onena".