Espainiako Gobernuak ez du "kontsumitzaileei errazionamendu edo murrizketarik ezartzea" aztertzen

Teresa Ribera Trantsizio Ekologikorako ministroak ziurtatu duenez, Espainiako Gobernuak ez du "kontsumitzaileei errazionamendu edo murrizketarik ezartzeko hipotesia" aztertzen. Gas kontsumoan "aurreztearen eta eraginkortasunaren" aldeko apustua egin du ministroak.

Riberak Bilboko Portuan egin ditu adierazpenak, DemoSATH haize-sorgailu itsas eolikoaren estreinakoan. Gas kontsumoa % 15 murrizteko Bruselaren egitasmoa hizpide izan du ministroak.

"Batzordearen proposamen zehatza zein den" ikusi beharko dutela esan du Riberak. Ministroaren hitzetan, "elkartasunaren aldeko dei oso indartsua egin dute", eta "Espainiak elkartasunarekin konpromisoa du, baina elkartasun hori emateko modurik onena ikusi behar dugu".

"Litekeena da", Espainiaren biltegiratze "gaitasunarekin lotura handiagoa izatea, gasbidetik heltzen den gasaren menpeko diren Estatu kideei babesa emateko", azaldu duenez. Ministroaren ahotan, Espainiako Gobernuak kontsumitzaile domestiko eta industrialekin "konpromisoa" du.

"Espainia Europarekin solidarioa izango da, baina gure elkartasuna askoz erabilgarriagoa izango da gure azpiegiturak erabili eta europarrak gasaz hornitzen baditugu, ez Espainiako kontsumitzaile domestiko eta industrialen kontura, aspalditik faktura oso garestia ordaintzen ari direlako, uharte energetikoa izateagatik, hain zuzen ere", nabarmendu du.

Espainiaren biltegiratze gaitasuna azpimarratu du agintariak, "Europako gaitasunaren % 30 baino gehiago delako". Gainera, Espainia "gas natural likidotuaren sarrera portu nagusia da", gogorarazi du. Hori kontsumitzaileen fakturetan islatu da, eta "orain ez dute murrizketarik merezi", gaineratu duenez.

"Aurreztearen eta eraginkortasunaren aldeko apustua" beharrezkoa ikusten du ministroak, baina "kontsumitzaileei errazionamendu edo murrizketarik ezartzeko hipotesia" ez du aztertzen.

Riberak ziurtatu duenez, "lehenago edo beranduago" Errusiak Europara gasa bidaltzeari utziko dionaren "uste sendoa dute". Europak, bestalde, "Errusia gas, ikatz, petrolio eta uranio hornitzaile nagusia izateari uztea nahi du", erantsi du.