Itxi

Ekonomia

Elkarrizketa Radio Euskadin

Igor Arroyo: "LABek ez du sinatuko langileen erosteko ahalmena bermatzen ez duen hitzarmenik"

EITB MEDIA

Sindikatuko koordinatzaile nagusiak KPIaren igoerarekin lotzen du berme hori, baina, nolanahi ere, zehaztu du hainbat modu egon litezkeela ziurtatzeko, enpresaren tamaina eta baldintzak kontuan izanik. Gainera, Lan Arriskuak Prebenitzeko Legea erabat betetzeko baliabideak galdegin ditu.

  • Igor Arroyo LABeko koordinatzaile nagusi laguntzailea. Argazkia: Radio Euskadi.

    Igor Arroyo LABeko koordinatzaile nagusi laguntzailea. Argazkia: Radio Euskadi.

LABek "ez du sinatuko langileen erosteko ahalmena bermatzen ez duen hitzarmenik", Igor Arroyo sindikatuko koordinatzaile nagusiak asteazken honetan Radio Euskadiko "Boulevard" saioan adierazi duenez. Arroyok KPIaren igoerarekin lotzen du berme hori, baina, nolanahi ere, zehaztu du hainbat modu egon litezkeela ziurtatzeko, enpresaren tamaina eta baldintzak kontuan izanik. Gainera, Lan Arriskuak Prebenitzeko Legea erabat betetzeko baliabideak galdegin ditu.

Testuinguru honetan, Arroyok gogora ekarri du nola, 2011tik, langile bakoitzak 6.000 euro galdu dituela, batez beste, erosteko ahalmenari dagokionez: "lehenik, esan ziguten Lehman Brothersen porrotagatik zela; gero, pandemia argudiatu zuten; eta, azkenik, Ukrainako gerragatik dela diote", adierazi du. Koordinatzaile nagusi laguntzaileak, baina, deitoratu du politika publikoek gero eta gehiago pobretzen dituztela langileak, aberastasuna banatu beharrean.

Arroyoren esanetan, LABek zazpi hitzarmen probintzial hitzartu ditu uztailean eta abuztuan, eta nabarmendu du lehentasuna dela "langileen erosteko ahalmena bermatzea". Akordioak, baina, "zentzuzkoak" izan behar dira, "agian desberdinak enpresa nolakoa den kontuan izanik"; alegia, ez da berdina egoera enpresa multinazional baten kasuan eta tamaina txikiagoa duen enpresa batean: "Zergatik enpresa handi batzuek mozkinak dituzte eta soldata- igoera ez da parekoa?", salatu du.

KPIaren igoerarekin lotzen duen soldata-igoera hori, Arroyok azaldu du beharrezkoa dela zehaztea nola egin ahal den kasu bakoitzean: "Izan daiteke urtez urte, edo beste modu batzuetan", esan du, eta berretsi du LABek ez duela sinatuko hitzarmenik "ez bada indarraldiaren amaieran bermatzen dutela langileen erosteko ahalmena".

Lan Arriskua Prebenitzeko Legea

Igor Arroyoren aurreikuspena da urte politikoaren hasiera "gogorra" izatea, eta Lan Arriskuak Prebenitzeko Legea izan du hizpide; gogora ekarri duenez, Eusko Jaurlaritzak du eskumena arlo horretan, eta ezinbestekoa da horrek baliabide guztiak erabiltzea legea betetzeko, eta ikuskapenak indartzeko: "Hainbat lan-istriputan errepikatzen den eredu bat ikusten dugu, alegia, biktimak azpikontratatutako langileak direla, edo kontratu prekarioak dituztela; beraz, aukera zegoen istripu horiek saihesteko", azpimarratu du. Koordinatzaile nagusiaren iritziz, Jaurlaritzak zehaztu beharko luke "zer egingo duen, zein neurri abiatuko dituen", ikuskapenei dagokienez.

Mitxel Lakuntza ELA sindikatuko idazkari nagusiaren esanetan, "LAB EH Bilduren ildo politiko beretik aritzen da", baina Arroyok ukatu egin du hori, eta aldarrikatu du bera kidea den sindikatua autonomia dela. LABen eta ELAren arteko adostasun-mailaz, onartu du ez dagoela "akordio orokorrik", baina "lankidetza sindikala egon badago; izan ere, langileak haserre daude, erosteko ahalmena galdu baitute, eta, hortaz, mobilizazioak eta grebak daude", azken hamar urteotan baino gehiago, esan duenez: "Horretan, bat egiten dugu, enpresa- eta sektore-mailan", esan du.

LABek helegitea aurkeztuko du, Osakidetzako lan-eskaintzaren publikoaren ikerketa ez luzatzeko autoaren aurka, eta hizpide izan du hori ere Arroyok; sindikatuko zerbitzu juridikoak "lanean daude", helegite horretan. "Ez dugu ulertzen" erabaki hori, esan du, "oraindik gauzatu ez diren hainbat jarduera ditugulako".

Koordinatzaile nagusia, horrez gain, Nafarroako eta EAEko suhiltzaileen aldarrikapenaz mintzatu da; hain zuzen ere, suhiltzaileek eskatu dute baso-suteen aurka borrokatze aldera, aireko baliabidea izatea, eta lanak espezifikoagoak eta espezializatuagoak izan daitezela: "Zerbitzu publikoetan, ez dago ahalik eta bitarteko gutxien baliatzerik", nabarmendu du.

  • Bisitatuena

      Kargatzen ikusiena
      Kargatzen ikusiena