Ekonomia -
gutxieneko soldata
Lanbide arteko gutxieneko soldata batez besteko soldataren % 60tik gora igotzearen alde agertu da Yolanda Diaz
Lan ministroak "herrialdearekiko konpromisoa" eskatu dio Antonio Garamendi CEOEko presidenteari, eta hitzarmen kolektiboen negoziazioan izandako blokeoa kritikatu du.
AGENTZIAK | EITB MEDIA
Yolanda Diaz Lan eta Gizarte Ekonomiako ministroa lanbide arteko gutxieneko soldata batez besteko soldataren % 60tik gora igotzearen alde agertu da, "ziurgabetasun handiko" egoera ekonomikoa baitago.
"Argi dago bizitzen ari garen egoeraz jabetu behar dugula", esan du Diazek gaur Diputatuen Kongresuko osoko bilkuraren atarian.
Bigarren presidenteordeak gogorarazi du Langileen Estatutuaren 27. artikuluak gutxieneko soldataren balioa handitzea ezartzen duela, inflazioaren, soldatek errenta nazionalean duten partaidetzaren, produktibitatearen eta egoera ekonomikoaren arabera.
"Lanbide arteko gutxieneko soldata igoko dugu eta CEOEri bere herrialdearekin konpromisoa hartzeko eskatuko nioke", esan du Diazek, eta "Espainiako patronalaren aurkako mobilizazio sindikalen" alde agertu da.
Lan ministroak "bere herrialdearekiko konpromisoa" eskatu dio Antonio Garamendi CEOEko presidenteari, eta hitzarmen kolektiboen negoziazioan dagoen blokeoa kritikatu du.