Ekonomia -
Elkarrizketa Radio Euskadin
Turismo eta Merkataritza sailburua, Arabar Errioxako ardoak Errioxa jatorri izendapenean jarraitzearen alde
Hala ere, Javier Hurtadok "markaren barruan gehiago desberdintzea" proposatu du, EAEko Justizia Auzitegi Nagusiak "Arabako Mahastiak" etiketaren erabilera galarazi ostean.
agentziak | eitb media
Javier Hurtado Eusko Jaurlaritzaren Turismo, Merkataritza eta Kontsumo sailburuak Arabar Errioxako upategiek "Errioxako Jatorri Izendapenaren barruan jarraitzeak duen garrantziaren eta nazioarteko sonaren" alde egin du, nahiz eta "markaren barruan gehiago desberdintzea" proposatu duen.
Radio Euskadik elkarrizketa egin dio gaur Javier Hurtado sailburuari, eta Euskal Autonomia Erkidegoko Auzitegi Nagusiak "Arabako Mahastiak" etiketa erabiltzeko aukera behin-behinean bertan behera uzteko hartu duen erabakia izan du hizpide.
Erabaki judizialei, Eusko Jaurlaritzaren neurriei eta upategiei ("oso gutxi dira") errespetua agertu ondoren, azpimarratu du "Turismo sailburu eta sozialista arabar gisa" beti defendatu duela upategi horiek Errioxako Jatorri Izendapenaren barruan egotea, "duen garrantziagatik eta nazioarteko sonagatik".
Dena den, adierazi du "sakondu" egin beharko litzatekeela "Arabar Errioxako upategiak jatorri izendapenaren barruan bereizteko neurrietan".
