Ekonomia -
Diputatuen Kongresua
De Guindosek bankuen erreskatea azalduko du gaur
Bestalde, Kongresuko Diputazio Iraunkorrak Rajoyri azken murrizketei buruzko azalpenak eskatzea aztertuko du arratsaldean.
Erredakzioa
Luis de Guindos Ekonomia ministroak agerraldia egingo du gaur Diputatuen Kongresuan, Espainiako bankuen erreskatea azaltzeko.
Euroguneko Finantza ministroek ostiralean onartu zuten erreskatea, aho batez eta aldaketarik gabe. Helburua, Espainiako bankuei 100.000 milioi euro arteko laguntza ematea, hainbat baldintzaren truke.
Hori horrela, De Guindosek azalpenak emango ditu gaur Behe Ganberako Ekonomia batzordean. Espainiak bihar sinatuko du erreskatea.
Laguntzaren lehen zatia (30.000 milioi euro) hilabetea bukatu baino lehenago emango dute.
Trukean, Espainiak 32 baldintza bete beharko ditu, batik bat bankuei begira, baina "zainketa estua" jasotzea ere onartuko du.
Rajoyren balizko agerraldia
Bestalde, Kongresuaren Diputazio Iraunkorra berriz ere batzartuko da gaur, Mariano Rajoy gobernuburuari eta bederatzi ministrori azken murrizketei buruzko azalpenak eskatzea aztertzeko.
Eskaera hainbat talde parlamentariok egin dute, eta Diputazio Iraunkorrak arratsaldean bozkatuko du.
Taldeek RTVEko eta Botere Judizialaren Kontseilu Nagusiko (BJKN) presidente berriek ere agerraldia egitea eskatu dute.
