Ekonomia -
Lan-istripua
ELAk basogintza sektoreko prekarietatea salatu du Zallan egindako elkarretaratzean
Prebentzioa eta formazioa ezinbestekoak direla esan du sindikatuak. Lan-politikak errotik aldatu behar dira, langileen osasuna lehentasuna izan dadin", erantsi du.
AGENTZIAK | EITB MEDIA
ELA sindikatuak deituta, elkarretaratzea egin dute gaur Zallan, baso-sektoreko prekarietatea salatzeko, eta apirilaren 24an Artzentalezen lan-istripu bat izan ondoren hildako 22 urteko langilearen familiari eta lagunei babesa adierazteko.
Sindikatuak komunikatu baten bidez adierazi duenez, "urtero gertatzen dira istripu larriak eta hilgarriak basogintzako sektorean". 2021tik 12 langile hil direla azpimarratu dute oharrean, gehienak zuhaitzek kolpatuta, baina baita makinek harrapatuta edo istripu ez-traumatikoetan ere.
ELAren arabera, "istripu hauek ez dira zorte txarraren ondorio"; aitzitik, "prekarietate handiko" sektore batean gertatzen dira, eta langileek "lan erritmo, pisua eta gehiegizko gainkargak jasaten dituzte.
Bestalde, nabarmendu duenez "askotan enpresa txikietan ez da prebentzioko araudia betetzen, prestakuntza falta handia dago eta migratzaileen tasa handiak daude".
Sindikatuak ziurtatu du "prekarietatearen aurka lan egiten jarraituko" duela, eta "beharrezko baliabideak eskatuko dizkio dagozkion gobernuari enpresetan eta lantokietan prebentzio-araudia betetzen dela bermatzeko". "Lan-politikak errotik aldatu behar dira, langileen osasuna lehentasuna izan dadin", erantsi du.